Субрата Рој по трет пат во Македонија

Рој заедно со претставници на Владата ќе престојува во Охрид и во Скопје каде што ќе разговара за деталите за туристичкиот комплекс во Љубаниште

Според најави од Владата, в среда и четврток оваа недела, индискиот бизнисмен Субрата Рој по трет пат ќе дојде во земјава. Рој заедно со претставници на Владата ќе престојува во Охрид и во Скопје каде што ќе разговара за деталите за туристичкиот комплекс во Љубаниште, за намерата за изградба на објект посветен на Мајка Тереза на скопскиот плоштад, како и за други инвестиции. Неговата компанијата „Сахара Индија Паривар“, меѓу другото, е заинтересирана и за инвестиции во земјоделството за што е доставен предлог-проект за комбинатот „Џумајлија“.

Инаку, Рој веќе најави дека на брегот на Охридско Езеро е заинтересиран да гради хотели, казина, спортски центри, викенд-населба, но и сопствено пристаниште, а проектот се вика „Сахарајан Македонија“.

Како што изјавија есента, претставници на оваа индиската компанија, комплексот ќе се простира на површина од 240 хектари, а локацијата, најверојатно, ќе биде Љубаниште. Проектот за комплексот го има изработено британска компанија „Аткинс“ и за него е изработена и целосна еколошка студија.

Се претпоставува дека проектот „Сахарајан Македонија“ ќе чини неколку десетици милиони евра. (Ек.Р.)