Инаугурација на Обама на Капитол

Обама и Бајден заклетвата ќе ја дадат вторпат, тие се заколнаа вчера во затворени церемонии во Белата куќа и во резиденцијата на потпреседателот во Џорџтаун

Во Вашингтон денеска се одржува свечената инаугурација на Барак Обама, во неговиот втор мандат како претседател на Соединетите Американски Држави.

Свеченоста почнува околу 11 часот според источно американско време, а ја отвораат бендот на маринците и познатиот хор на Бруклинската табернакл црква, а во текот на свеченоста ќе настапат и пејачите Кели Кларксон и Џејмс Тејлор. Сенаторот Чак Шумер, како претседавач со комитетот за инаугурација ќе ги покани претседателот Обама во Капитол, по што новинарката Мурли Еверс Вилијамс, сопруга на убиениот борец за правата на Афроамериканците Медгар Еверс, ќе се помоли за успех на вториот мандат на претседателот Обама.

Предвидено е потоа да следуваат свечените заклетви на потпретседателот Бајден, а потоа и на претседателот Обама. Бајден заклетвата ќе ја даде пред судијата Соња Сотомајор, една од двете судијки именувани од претседателот Обама во ова тело. Обама заклетвата ќе ја даде пред претседателот на Врховниот суд Џон Робертс, држејќи ја десната рака врз две Библии, едната врз која бил инаугуриран претседателот Абрахам Линколн, а другата која во сопственост на убиениот борец за човекови права Мартин Лутер Кинг.

Обама и Бајден заклетвата ќе ја дадат вторпат, тие се заколнаа и во неделата, во затворени церемонии во Белата куќа, односно во резиденцијата на Бајден во Морнаричката обсерваторија во Џорџтаун.

Уставот предвидува заклетвите да бидат дадени на 20 јануари, но традицијата налага, во случаите кога овој ден се паѓа во недела, свечената инаугурација да се одржи уште еднаш, на следниот ден.

Се очекува заклетвата на Обама да ја проследи целосниот состав на Конгресот на САД, администрацијата на Обама и дипломатскиот кор во Вашингтон, како и голем број граѓани и претставници на медиумите поканети на централниот подиум. Поранешните претседатели Бил Клинтон и Џими Картер ќе бидат присутни, но не и Џорџ Х. В. Буш и неговиот син Џорџ В. Буш, кои отсуствуваат поради болеста на постариот Буш.

Невообичаено, нема да присуствува ниту поразениот кандидат, Мит Ромни, кој за разлика од повеќето поразени кандидати во изминатите години, нема официјална функција поради која би бил поканет. По заклетвата, Обама ќе го одржи своето инаугурално обраќање. По обраќањето, поетот Ричард Бланко, син на бегалци од Куба и активист за правата на хомосексуалците, ќе прочита дел од својата поезија, а потоа ќе следи молитвата на свештеникот Луис Леон, кој богослужи во црквата Свети Јован, во близина на Белата куќа, во која честопати се моли првото семејство на САД.

Леон е втор избор за молитвата, свештеникот од Атланта Луи Гиглио, инаку активист против трговијата со луѓе, беше првиот избор на инаугуралниот комитет, но оваа одлука беше повлечена поради протести на здруженија за правата на хомосексуалците, поради изјави на Гиглио против истополовите бракови.

Свеченоста пред Капитолот завршува со Пејачката Бијонсе ќе ја изведе американската химна, по што почнува парадата по должината на авенијата Пенсилванија, од Капитолот до Белата куќа. Вкупно 60 разни здруженија, на воени, полициски и противпожарни друштва, етнички и верски заедници од САД и разни политички организации ќе учествуваат во парадата со специјално подготвени макети и го придружуваат претседателот и потпретседателот со нивните семејства до Белата куќа.

Во попладневните часови ќе се одржат трите големи инаугурациски балови во конвенцискиот центар во Вашингтон. Од официјалните настани во програмата на инаугурацискиот комитет, предвидено е Обама и Бајден со нивните семејства да присуствуваат и на богослужбата во националната катедрала на Вашингтон, утрото на 22 јануари.

Сепак, предвидени се и голем број помали и помалку формални настани. Во саботата се одржа детскиот инаугурален концерт, на кој настапија Кети Пери и Ашер, како и групите Мајндлес Бихејвиор и Фар Ист Мувмент. На 22 јануари ќе се одржи помал бал само за организаторите на изборната кампања на Обама, на кој е најавено дека ќе пее контроверзната Лејди Гага.

Интересот за инаугурацијата е значително намален во однос на првата инаугурација на Обама, во 2009 година, кога околу 1,8 милиони граѓани се собраа меѓу Капитолот и Белата куќа. Проценките се дека околу 600.000 граѓани ќе присуствуваат на годинешната инаугурација.