Пратениците на Руфи Османи се враќаат во Собрание

По едномесечен бојкот пратениците на НДП се враќаат во Собранието и како опозиција ќе учествуваат во неговата работа

Пратениците на партијата на Руфи Османи НДП по едномесечен бојкот се враќаат во Собранието и како опозиција ќе учествуваат во неговата работа. Ваква одлука прексиноќа донело партиското Централно претседателство, кое констатирало дека поголема штета прават ако го бојкотираат парламентот, отколку да се внатре и да ги бранат ставовите на граѓаните кои ги избрале.

Пратеникот од НДП Изет Зекири денеска најави дека утре, најдоцна задутре заедно со колешката Фламуре Демири - Креци ќе дојдат во Собранието и ќе предложат одл��ка за формирање Анкетна комисија, која треба да ги истражи случувањата на 24 декември.

„Изминатиов месец додека го бојкотиравме Собранието немаше никаков напредок во насока на решавање на проблемите, ниту пак утврдување на одговорноста. Единствено владејачкото мнозинство без никаква контрола изгласуваше закони во парламентот, кои не се од интерес за сите граѓани, туку само за ВМРО-ДПМНЕ. Затоа решивме да се вратиме во Собранието, бидејќи мора да има некој што ќе дискутира и што ќе предлага амандмани на законите што ги доставува Владата“, објаснува Зекири.

Тој очекува дека предлогот за формирање н а Анкетна комисија ќе добие поддршка од најмалку 20 пратеника, колку што се потребни за да се формира ова работно тело. Додава дека главна задача на оваа комисија ќе биде да утврди што точно се случило на 24 декември, кога како што вели, пратениците од опозицијата беа насилно исфрлени од Собранието и кој ја дал таа наредба.

„Очекувам за извештајот на Комисијата, но и за препораките да расправа Собранието“, објаснува Зекири. (Т.П.)