Заштитениот сведок за убиството во Ореше не дојде во судот

Љубиша Станковиќ

Сведокот кој изминатите пет години имаше статус на заштитен сведок во постапката што се води против браќата Љупчо и Ордан Ѓеоргиевски и против Ѓоре Петровски од денеска повеќе не се води под шифрираното име „Бреза“. Имено, на распитот закажан за денеска, сведокот „Бреза“, кој од технички причини наместо во велешкиот требаше да биде сослушан во скопскиот Кривичен суд, не се појавил во големата судница. Како што дознаваме, судијата Иле Темов го прочитал неговиот исказ во кој било наведено дека тој повеќе не сака да биде заштитен сведок во случајот за кој Петровски се товари како нарачател, а браќата Ѓеоргиевски како извршители на убиството на 74-годишниот Лазар Милошевски од велешкото се��о Ореше во декември 2005 година.

Со решението на судот согласни биле и бранителите на обвинетите и тие на судското рочиште се согласиле да се откажат од жалба, што значи дека судската одлука станала правосилна.

Ваквиот расплет на настаните, а по неколкугодишното држење зад решетки на обвинете браќа и по екстрадицијата на Петровски од САД во Македонија, само навидум претставува изненадување. Всушност, за заштитениот сведок со псевдоним „Бреза“ веќе подолго време се говори дека повеќе не сака да работи во прилог на Обвинителството, односно дека не сака никого неосновано да обвинува за настанот од 2005 година.

Што ќе се случува во почетокот на идниот месец за кога во Основниот суд во Велес е закажано продолжението на овој судски процес засега е неизвесно, но многу е веројатно дека сведокот „Бреза“ ќе се идентификува и ќе ја каже својата верзија на случувањата.

Постојат одредени кажувања според кои сведокот „Бреза“ неодамна дал исказ, на повеќе од 20 страници, и дека во него, наводно, обвинувал конкретни лица дека му вршеле притисок и дека токму поради заканите што му биле упатувани бил присилен лажно да сведочи.

Доколку ваквите обвинувањата од сведокот „Бреза“ се покажат како точни, тогаш тој ќе треба да одговара за лажно сведочење, но во исто време на одговорност ќе бидат повикани и оние лица кои тој ги посочува како уценувачи. Токму поради многу недоречености, овој судски процес на неколку пати беше преотворан од почеток, а за истиот случај Републичкиот судски совет го разреши и истражниот судија Валентин Зафиров.