22.01.2013, 13:44 СДСМ: Ќе ги браниме интересите на граѓаните и на демократијата
На само еден и пол час пред почетокот на лидерската средба, опозицијата повторно блокираше три сообраќајници во главниот град
Остануваме доследни на својата примарна цел - враќање на демократијата во земјата и, како што гледате, нема да отстапиме од таа цел. Затоа, продолжуваме да ги браниме интересите на граѓаните и демократијата, но надвор од институциите, се додека нивниот легитимитет не се поврати преку волјата на гласачите изразена само преку слободни и фер избори. Ова го истакна денеска потпретседателката на СДСМ, Ана Павловска Данева за време на блокадата на опозицијата на раскрсницата кај Тутунскиот комбинат во Скопје.
На само час и половина пред почетокот на лидерската средба меѓу претседателот на СДСМ, Бранко Црвенковски и премиерот Никола Груевски, опозицијата повторно блокираше три сообраќајници во главниот град - раскрсницата кај Тутунскиот комбинат, кај мостот Гоце Делчев и кај „Симпо“.
„Врне дожд, а тоа според нашиот народ значи бериќет. По се што преживеа народот од 24 декември, ова е добар знак“, рече Данева.
Според неа, нормално и логично е пратениците да бидат први на барикадите на отпорот, тогаш кога беа укинати институциите. „Сега сме на раскрсниците во Скопје и ќе бидеме секаде каде што ќе се манифестира отпорот против власта“, вели Данева.
Таа додаде дека примарна цел како пратеници им е да го бранат Уставот и Законите и да ги застапуваат интересите на граѓаните во Собранието.
„Свесни сме дека блокадите на три раскрсници одеднаш во Скопје можат да предизвикаат непријатности и нервоза, затоа ја користам оваа прилика да апелирам до граѓаните да имаа поголемо трпение, имајќи предвид дека во овој момент ова е единствениот начин, преку улична демократија, заеднички да му пружиме отпор на режимот“, е апелот кој го упати опозицијата.
Опозицискиот „Сојуз на иднината“ предводена од СДСМ, вчера вечер одржа и протестен марш низ Куманово, кој заврши со отворен граѓански парламент.
„Оваа земја не му припаѓа ниту на СДСМ ниту на ВМРО-ДПМНЕ. Оваа земја му припаѓа на народот. Ова веќе не е борба за власт, туку за иднина, а народот ќе каже каква иднина сака. Оваа одлука ќе ја донесе народот на фер, демократски парламентарни избори. Тоа е единственото решение на оваа политичка криза“, рече лидерот на СДСМ, Бранко Црвенковски.
Градоначалникот на Куманово ги повика кумановчани да се приклучат на отпорот и да ја покажат желбата и борбата за демократска Македонија. (Д.Т.)
|
