Груевски е подготвен да свика лидерска средба

Премиерот нагласи дека Владата ќе продолжи со реформите и нема да дозволи опозицијата да наштети на евроинтеграциите

Премиерот Никола Груевски е подготвен да свика лидерска средба доколку на претседателот на опозициската СДСМ Бранко Црвенковски му треба излезно решение од ситуацијата во која влегол. Црвенковски, смета Груевски, е прилично изолиран во неговите намери за бојкот на локалните избори.

„Ако во еден даден момент на Црвенковски му треба излезно решение од ситуацијата во којашто влезе, ако почувствуваме каква било потреба за средба помеѓу нас, јас нема да се двоумам и ќе повлечам чекор во тој правец“, и��јави денеска Груевски, по посетата на две нови лаборатории на Природно - математичкиот факултет.

Груевски додаде дека од комитетите на ВМРО-ДПМНЕ добива информации оти СДСМ активно работи на подготовка за локалните избори и насекаде зборувале дека претставниците кои им доаѓаат од раководството во Скопје им укажувале оти локални избори ќе има и дека СДСМ ќе учествува.

„Црвенковски го поддржуваат два-тројца луѓе од раковдоството. Другите одат на терен и ги информираат нивните комитети да се подготвуваат и да работат затоа што тие цврсто веруваат дека СДСМ ќе учествува на локалните избори, изјави Груевски.

Нема да дозволиме опозицијата да наштети на евроинтеграциите

Владата ќе продолжи со реформите и нема да дозволи опозицијата да наштети на евроинтеграциите, истакна Груевски, коментирајќи дали однесувањето на опозициската СДСМ може да влијае или да наштети на интеграциите на Македонија во Европската унија.

Според Груевски, реформите што треба да се преземат за евроинтеграциите преку конкретни чекори, приближување на законодавство, .... се работа што Владата ќе ја заврши без оглед дали СДСМ биле во Парламентот или не.

- И нема да застанеме, ниту пак да се дефокусираме во тој поглед. Но, во оној дел каде се гледа атмосферата во државата, угледот, политичката клима, тука може да направи одредена штета и токму затоа го повикувавме СДСМ да престане да го прави тоа, изјави Груевски, по посетата на две нови лаборатории на Природно-математичкиот факултет во Скопје.

Сосема е јасно, посочи премиерот, дека таа штета оди некому во прилог. - И малку е симптоматично зошто секогаш кога на земјата ќе и тргне, кога ќе добиеме како сега најпозитивен извештај, кога се покрена во Брисел една дискусија за добивање датум што дотогаш никогаш не беше покрената, секогаш кога ќе се случи такво нешто, се јавува некој фактор, некое лице, како во случајов Бранко Црвенковски, кој сакајќи наводно да оствари некои сопствени цели, практично прави штета на имиџот на државата, на угледот, на оценката што треба да ја добива државата на нејзиниот пат на европските интеграци, изјави Груевски.

Како и да е, порача премиерот, како Влада ќе продолжиме да работиме да се минимизираат тие штети или колку што е можно да отстранат и во тој поглед не случајно во минатите денови го повикувавме СДСМ да се врати таму каде што му е местото.