Само 110 граѓани зеле од евтините станбени кредити

Државата за субвенционирање на овие кредити издвоила 640.000 евра субвенции, информираат од Министерството за финансии

Иако очекувањата беа многу големи при промовирањето на проектот „Купи куќа, купи стан“, само 110 граѓани зеле субвенциониран станбен кредит. Државата за субвенционирање на овие кредити издвоила 640.000 евра субвенции, информираат од Министерството за финансии. Најмногу, 10.048 евра субвенции добиле граѓаните кои зеле субвенциониран станбен кредит во висина од 50.000 евра, преку моделот „половина рата“.

Од Министерството за финансии објаснуваат дека во овој случај, првите три години месечната рат�� е 329 евра, од кои 164 евра ги плаќа граѓанинот кој го зел кредитот, а останатите 164,5 евра ги плаќа Владата. Во наредните две години, пак, месечната рата изнесува 343,91 евро, при што Владата обезбедува 171,95 евра од ратата.

Дополнителни заштеди граѓаните добиваат и преку каматите, при што заштедата е од две илјади до три илјади евра. Моментно каматата што ја нудат банките за станбен кредит изнесува просечно од 6,2 проценти до 6,5 проценти за првите три години, и од 7,5 проценти до 8,05 проценти за останатиот дел од периодот на отплата, додека каматите на субвенционираниот станбен кредит се фиксни за првите пет години и тоа 4,99 проценти за првите три години и 5,49 проценти за четвртата и петтата година.

Глигор Бишев, директор на Стопанска банка, оценува дека доброто во овој проект е што и по петтата година каматите за субвенционираните кредити ќе останат најниски на пазарот. „Стопанска банка ќе продолжи и оваа година да биде вклучена во проектот. Каматните стапки за првите пет години се гарантирани, и тоа во првите три години изнесуваат 4,99 проценти, а во четвртата и петтата година 5,49 проценти. По петтата година, на кое ниво ќе бидат утврдени каматните стапки ќе зависи од движењето на еуриборот. Но, имајќи предвид дека Европската централна банка најавува дека каматните стапки ќе останат на сегашното ниво, како и очекувањето дека овие кредити редовно ќе се враќаат бидејќи станува збор за купување прв стан, очекуваме и по петтата година, каматните стапки да бидат поповолни во однос на оние за останатите редовни кредити“, појаснува Бишев. И годинава Владата во соработка со банките објави нови јавни повици преку кои граѓаните ќе можат да аплицираат за субвенционирани станбени кредити до 31 мај. (Ек.Р.)