Камерон предлaга референдум за членството на Британија во Унијата

Без реформа во Европската унија постои опасност Британците да ја напуштат Унијата, предупреди денеска британскиот премиер Дејвид Камерон во долгоочекуван говор за иднината на односите меѓу Лондон и ЕУ.

Наведувајќи ги проблемите во еврозоната и „кризата на европските надлежности“, Камерон рече: Ако не се соочиме со тие предизвици, постои опасност од урнисување на Европа и британскиот народ ќе се упати кон излезот“.

Тој најави и дека ако ги победи на изборите во 2015 година, до крајот на 2017 година ќе распише референдум за тоа дали Велика Британија треба да остане членка на ЕУ.

Камерон додаде дека доколку бидат воспоставени нови односи меѓу Британија и ЕУ, какви што одговараат на Лондон, тој ќе биде среќен да поддржи останување на државата во Унијата. Не прецизираше какви овластувања сака за Британија во рамки на „новите односи“.

Британскиот премиер рече дека државата не сака да подигне мост меѓу островот и континентот ниту да се повлече од светот, но разочарувањето на јавноста по рпашање на ЕУ е максимално и граѓаните сметаат дека „ЕУ оди во правец за кој Британците не се определиле“.

- Кога ќе преговараме за ново решение, ќе му овозможиме на британскиот народ на референдум да се изјасни дали сака да остане во ЕУ под нови услови...Тоа ќе биде референдум за или против, нагласи тој.

ЕУ според него, мора да се заснова на пет принципи: конкурентност, флексибилност, јакнење, демократска одговорност и правичност. Должничката криза е главна причина поради која Британија мора да ги преиспита односите со ЕУ, нагласи Камерон.

Намерата на премиерот Дејвид Камерон да организира референдум за тоа дали Велика Британија ќе остане во ЕУ, или ќе замине, е „мошне ризична стратегија“, пишува лондонски „Фајненшл Тајмс“.

Според тој весник, таквата политика претставува сериозен тест за подготвеноста на Франција и на Германија да не се согласат со поинаков и како што вели Камерон, подобар договор на Велика Британија со ЕУ. Лондонските проевропски весници го критикуваат однесувањето на премиерот кому досега му забележуваа дека нема доволно храброст за преземање поинакви мерки за економските проблеми во домашната економија.

„Индепендент“ оценува дека со барањето нови преговори и заканата со референдум за напуштање на ЕУ, доколку не се добие согласност за нов договор, Камерон, практично, веќе ја има отворено вратата за излегување на земјата од Унијата во која е веќе 40 години. За тој весник, евентуалната таква разврска, претставува закана од губењето на инвестициите кои креираат работни места.

Пролабуристичкиот „Гардијан“ смета дека Камерон со својата политика „удира во срцето“ на европскиот проект.

Со неговата определба не се согласуваат опозициските лабуристи, како и либералдемократите кои сега се во владината коалиција. Проевропските партии, како и проевропеските асоцијации најавија остра пресметка со политиката на Камерон, што тие ја оценуваат како „опасно коцкање“ со политичката и економската иднина на земјата.

За разлика од нив, проконзервативните медиуми и аналитичари со одобрување го прифакаат говорот на Камерон. Претставник на најевроскептичната британска партија УКИП (Партија на британската независност) тврдат дека свртувањето на Камерон е само нивна заслуга.