23.01.2013, 15:10 Meѓаши: Кој ќе сноси одговорност за смртта на детето?
Дали се вредни реакциите на институциите откако уште едно дете ќе биде убиено, занемарено, злоставувано или постојано психички и физички малтретирано? Ова е дилемата која ја отвори Првата детска амбасада во светот Меѓаши во врска со зачестените случаите на насилство врз деца, кои завршуваат со смрт. По случајот во Радовиш, каде татко до смрт го претепа осумгодишниот син, невладината организација прашува дали смртта на едно дете, за жал би можело да е причина за освестување на сите надлежни институции, за поефикасно да постапуваат во случаи на насилство, негрижа и занемарување на дете. Но и да ги потикне да разработат механизми со кои превентивно ќе делуваат и поефикасно ќе ги заштитат останатите деца кои се жртви на секојдневно малтретирање.
„Но, кога ист таков случај ни с�� повторува, можеме да констатираме дека има институционална неефикасност. Ни се наметнува прашањето кој ќе сноси одговорност? Дали кривичното гонење на родителот сторител на вакво грозоморно дело е доволно?’, велат во „Меѓаши“.
Според нив, задоцнетите или несоодветни реакции од надлежните институции и Центрите за социјална работа го доведуваат во прашање животот на децата и нивниот оптимален раст и развој. Од таа причина Првата детска амбасада во светот апелира до Центрите за социјална работа, да имаат увид во дисфункционални семејства и семејства во ризик, да вршат надзор на вршењето на родителското право, да преземаат мерка на привремено одземање родителско право, додека односите во семејството не се доведат во релации кои ќе им гарантираат на децата сигурност и заштита. Центрите за социјална работа го одземаат родителското право дури кога ќе настанат тешки повреди и последици по децата.
„Карактеристично е дека децата не им веруваат на државните институции во процесот на нивна заштита, обидувајќи се да ја избегнат дополнителната трауматизација и виктимизација од страна на институциите, одбираат да молчат. Во таа насока, особено е важно државата и сите кои се грижат за децата да им овозможат да се чувствуват заштитено, разбрано и прифатено од сопствените родители, стрателите и од институциите на системот“, укажуваат од организацијата.
Потребно е државата да се обезбеди подобра заштита на децата и да разработи сеопфатана стратегија за заштита на децата од насилство. Неопходно е синхронизирано дејствување на сите релевантни институции, преземање на обврските и одговорностите предвидени со Уставот и Конвенцијата. За таа цел потребна е подобра соработка меѓу граѓанските организации и институциите на државата задолжени за спроведување на грижата и заштитата за сите деца во Македонија.
„Со цел да се превенира насилството во подолготрајни рамки потребно е навремено санкционирање и казнување на сторители без разлика за каков вид на насилство станува збор и кој е вршителот на насилството. Доколку сторителите не се казнат истите повторно ќе продолжат со својот модел на однесување и на индитректен начин институциите и тие кои се одговорни да го казнат и спречат таквото однесување всушнот го одобруваат и му даваат поголема моќ на насилсникот“, е ставот на „Меѓаши“.
|
