Светска банка: Сакаме да ги поддржиме реформите на Владата

За неколку месеци финансиската институција ќе и' одобри гаранција на Македонија за ново задолжување

Нина Нинеска-Фиданоска

Светска банка вчера за „Утрински“ потврди дека ќе и' одобри гаранција на македонската Влада, за таа да може да земе кредит кај странски комерцијални банки. Како што завчера соопшти министерот за финансии Зоран Ставрески, Владата на стартот на идната година планира да се задолжи на износ од околу 200 до 250 милиони евра, а овие средства ќе биле доволни и целосно да се исплати долгот кон компаниите, но и за да се зголемат пензиите и да се реализираат сите други владини ветувања.

Од Светска банка велат дека гаранцијата за земјава ќе ја одобрат за неколку месеци, но не откриваат колкава ќе биде нејзината сума.

„Операцијата во моментов се дискутира со Министерството за финансии, со цел да биде одобрена од Бордот на директори на Светска банка за неколку месеци“, потврдуваат од канцеларијата на Светска банка во Скопје.

СБ е децидна дека со гаранцијата сака да ги поддржи владините реформи, како и да помогне за зачувување на стабилноста на економијата.

„Оваа операција ќе ги поддржи постојните реформи спроведувани од Владата, а насочени кон јакнење на управувањето со јавните финансии и ублажување на влијанието на обновената криза во еврозоната врз најранливите групи граѓани. Таа ќе придонесе кон обезбедување краткорочно финансирање на буџетот под поволни услови во комплексно време за еврозоната, како и поддршка за обновување на растот на среден рок. Операцијата е тесно поврзана со програмата на Владата насочена кон зачувување на стабилноста на економијата и обезбедување одржливо и соодветно заздравување“, потенцираат од СБ.

Светските банкари објаснуваат дека ја даваат гаранцијата за Македонија поради тоа што за земјава бил отежнат пристапот до пазарите на капитал.

„Владата на Македонија и СБ ја подготвуваат втората гаранција за политики како одговор на обновената криза во еврозоната, која од втората половина на 2011 континуирано се одразува негативно врз стопанствата низ целиот Западен Балкан. Економскиот раст забави, извозот опадна, а пазарите на труд назадуваат. Негативните ефекти се прелеаја и на полето на фискалните политики, преку приходи од даноците кои се помали од очекуваните. Дополнително, турбуленциите на пазарите на капитал од мај годинава го направија пристапот до тие пазари потежок за земјите од Западен Балкан, вклучувајќи ја тука и Македонија“, објаснуваат од СБ, додавајќи дека апетитот за инвестиции и ризици кај глобалните инвеститори е разнишан, и целокупното инвестирање во странство е намалено.

Инаку, завчера министерот Ставрески потенцира дека со средствата што ќе се добијат во јануари в година од комерцијалните банки, ќе биде финансиран целиот буџетски дефицит, односно сите инфраструктурни проекти, отплатата на долгот, зголемувањето на пензиите и слично. Тој потенцира дека за годинава не се планира ребаланс на буџетот и ново задолжување, бидејќи имало доволно средства да се финансира буџетот за оваа година.

Од опозицијата, пак, не стивнуваат реакциите по обраќањето на премиерот пред бизнисменската елита, во кое вети целосно раздолжување. СДСМ смета дека најавеното враќање на долговите е само изговор Владата пред избори да ја задолжи државата. „Се' повеќе станува очигледно дека Груевски и Ставрески сето ова го направија со една единствена цел, да најдат изговор како пред избори да ја задолжат државата за нови 200 до 250 милиони евра. И овој пат, како и пред вонредните парламентарни избори во 2011 кога од ММФ беа позајмени 220 милиони евра, со единствено образложение за буџетски потреби, Вл��дата не објаснува за што ќе се потроши овој кредит. Колку пари од овој кредит се наменет за враќање на долговите кон стопанството? Колку се наменети за тековни буџетски потреби, а колку за капитални инвестиции? Ќе одговори ли некој на најголемата државна тајна - колкав е долгот на Владата кон стопанството?“, праша на вчерашниот прес Марјанчо Николов, пратеник од најголемата опозициска партија.

Според него, Владата сака на нетранспарентен и нејасен начин да ги задолжи македонските граѓани оваа 2012 и наредната 2013 за нови половина милијарда евра, без да даде објаснување како и за што ќе ги потроши овие пари. „Повеќето пари Владата веројатно ќе ги потроши за покривање на дупката во буџетот која секојдневно се продлабочува предизвикана од нејзините погрешни економски политики. Само во септември, додека го подготвувале и планирале новото задолжување, во Скопје се поставија десетици споменици... Сега кога признаа дека немало пари за овие мегаломански проекти и се граделе на вересија и на грбот на неликвидното стопанство, премиерот Груевски и министерот Ставрески прават уште една голема грешка. Подготвени се да го зголемат буџетскиот дефицит и задолжувањето, само за да продолжат со оваа економски поразителна политика“, рече Николов.

Од ВМРО-ДПМНЕ, пак, возвратија дека „СДСМ дејствува дезориентирано по одличните мерки на Владата, кои наидуваат на одобрување како од бизнис- заедницата, синдикатите, експертите, така и од самите граѓани. Овие мерки ги прифаќаат сите, освен СДСМ“, наведува партијата. Според нив, СДСМ немале храброст да поздрават ниту една владина мерка.