Буџетот во политички лавиринт

Претседателот на Собранието, Трајко Вељаноски, ја закажа пленарната седница за расправа за буџетот на 24 декември

Нина Нинеска-Фиданоска

Буџетот продолжува да биде една од главните точки на политички препукувања и барања. Владата тврди дека опозицијата го блокира неговото носење, а опозиционерите одговараат дека нивната намера е да се изгласа квалитетна државна каса, која ќе биде за доброто на сите граѓани.

Претседателот на Собранието, Трајко Вељаноски, ја закажа пленарната седница за буџетот на 24 декември. Од неговиот Кабинет велат дека главна цел на овој потег е да се почитуваат деловните одредби, според кои расправата за буџетот трае пет работни дена.

Вчера попладнето расправата во Комисијата за финансирање и буџет беше стигната до 137 амандман, од по��несени вкупно 1.226. Досега не е прифатен ниту еден амандман на опозицијата.

Претседателот на Комисијата за финансирање и буџет, Марјанчо Николов, вчера веќе не можеше да даде точно предвидување што ќе се случи со расправата. „ Комисијата работи дури и по 10, 11 или 12 часа, но поради политичките притисоци, не знам дали ќе постигне. Сметам дека се прави некое сценарио како некој намерно да сака да не се изгласа буџетот, за потоа некој друг да се обвинува за тоа“, вели Николов.

Партијата НДП на Руфи Османи вчера побара лидерска средба на која би се постигнал договор околу барањата и на опозицијата, и на тој начин би се деблокирало неговото гласање. „Во досегашната расправа Владата се однесува дрско, не прифаќајќи ниту еден од нашите амандмани, без воопшто и да образложи зошто не ги прифаќа“, ни изјави пратеникот Зеќири. Едно од главните барања на НДП е да се постигне согласност дека идната година мора да се реализираат капиталните инвестиции предвидени за западниот дел од земјава, за кои, како што велат, владејачката ДУИ ветувала оти ќе бидат потрошени 25 отсто.

Потпретседателот на СДСМ Зоран Јовановски, пак, вчера испрати писмо до шефот на парламентот Трајко Вељаноски кој претходно го обвини Јовановски за политички опструкции. Во писмото тој го потсетува Вељаноски на ставот од Законот за буџетите, а во кој се вели дека „во случај кога Буџетот за наредната година не е донесен до 31 декември, Министерството за финансии одобрува користење средства месечно најмногу до една третина од вкупните извршени расходи во првиот квартал од претходната година, најдоцна до 31 март...“

Јовановски го го обвини за „непознавање на проблематиката“. „Кога претседателот на Собранието, највисокиот законодавен дом, ќе се стави себеси во улога неосновано и неаргументирано да навредува некого, без претходно да ги провери информациите, тогаш тоа не е само негов личен срам, туку срам за институцијата и срам за граѓаните. Вие сте само уште една причина зошто во Македонија работите мора од корен да се променат“, се вели во писмото.

ВМРО-ДПМНЕ вчера ја обвини СДСМ дека го доведува во прашање носењето на буџетот. „Исклучително е неодговорно однесувањето на СДСМ и нивната пратеничка група, која го блокира работењето на комисијата, односно го доведува во прашање носењето на буџетот за 2013. Никогаш до сега во овие дваесетина години не се довело во прашање носењето на буџетот, а со тоа сериозно да се загрози и нормалното функционирање на државата“, рече пратеникот Илија Китановски од ВМРО-ДПМНЕ.

На расправата на комисијата, пак, министерот за финансии Зоран Ставрески повтори дека вистинската цел на СДСМ е да не се донесе буџетот. „Дајте навреме да ги исплатиме земјоделците и пензионерите. Не доведувајте го во прашање функционирањето на државата“, рече тој.