Живот како во камено време среде Аеродром

Жителите од зграда на улицата „Владимир Комаров“ откако го откажале парното греење, секој ден се без струја од 6 до 12 часа

ДЕСПИНА ТРАЈКОВСКА

По пет-шест часа речиси секој ден, а во неделите и по 12 часа без струја. Вака во последниве десетина дена живеат над шеесетина домаќинства од зградата на улица „Владимир Комаров“ број 33 во Аеродром. Велат, едвај издржуваат на овие минусни температури без електричната енергија, која кај сите овие станари годинава е единствен извор за затоплување.

Со проблемот почнале да се соочуваат оваа зима откако сите станари во зградата се откажале од парногреење и се топлат со термопечки, греалки, конвертори...

„Не очекувавме дека ќе се соочиме со ваков проблем. Од ЕВН не' убедуваа дека тоа нема да се случи, но, еве, се докажа спротивното. Испади на струјата имавме и лани, но не толку често и прекините не траеја долго. Но, тогаш од парно беа откажани половина станари од зградата, а годинава парно не користи никој. Со оглед на зачестеноста на испадите на струјата и времетраењето на дефектот, јасно е дека станува збор за немање капацитет за задоволување на нашите потреби од страна на ЕВН“, коментираат аеродромци од „Комаров“ 33.

Тие вчера за проблемот разговараа со надлежните од подружницата на ЕВН во Аеродром. Од таму, велат станарите, им тврделе дека проблемот не е до нив. За нивно добро им препорачале сами да се организираат и да договорат порационално трошење на струјата. Истовремено им укажале дека проблемот можат да го решат доколку самопридонесат во осовременување на мрежата од која тие се снабдуваат.

„Ни викаат сами да финансираме, а од друга страна тврдат дека капацитетот на мрежата е доволен да ги задоволи нашите потреби, што од старт отвора простор за сомнеж“, коментираат станарите од „Комаров“ број 33.

Велат дека во изминативе денови се буквално премрзнати. Не можат да вклучат ниту едно грејно тело, а ако се земе предвид дека не им работат ни шпоретите, ниту, пак, можат да стоплат бојлер, живеат секојдневие, како што коментираат, како во камено доба. Граѓаните на Аеродром истовремено се огорчени од односот на дежурната служба на ЕВН, која како што тврдат, интервенира на терен по шест часа откако ќе се пријави дефект со напојувањето на електрична енергија.