СДСМ до Владата достави предлог за буџетско штедење



Координаторот на пратеничката група на СДСМ Игор Ивановски изјави дека опозициската партија денеска до Владата го доставила предлогот за буџетско штедење и оти очекува одговор во врска со него. На денешаната координативна средба предлогот исто така бил доставен до учесниците на состанокот. Пратеничката група на СДСМ не отстапува од својот предлог, со кој како што вели Ивановски, се кратат 204 милиони евра од проектираниот Предлог - буџет предвидени за споменици, мебел, рекламирање итн.

Предлогот што го дал претседателот на Собранието Трајко Вељаноски, за нив не е предлог. - Ќе отидеме во 3 и 15, изјави Ивановски условувајќи дека доколку не биде прифатен нивниот предлог за кратење опозицијата ќе остане на своите амандмани. Според него, опозициските пратеници ќе работат до разгледувањето на последниот амандман и нема да дозволат насилничко, неделовничко однесување на Законодавно-правната комисија.

Лага е, додаде тој, дека пензионерите, стечајците и други категории лица нема да ги добијат платите. Како пример посочи на 2003 година кога буџетот беше донесен на 27 март 2003 година поради изборите.

Ова во својата изјава го тврди и Тито Петковски, велејќи дека тогаш државата нормално функционирала.

Имер Алиу од ДПА, смета дека дебатата за буџетот е дефокусирана, бидејќи Албанците се дискриминирани. Нема да ги повлечат предложените 140 амандмани бидејќи, според него, содржат правична застапеност.

На координацијата кај Вељановски не присуствуваат бидејќи остануваат на барањето законот за бранители да биде повлечен од Собранието.