Вработените во ОХИС повторно на протести

Центарот на Скопје денеска беше блокиран поради протестот на вработените во ОХИС, кои се собраа пред Владата и Собранието. Тие упорно бараат средба со претставници од Владата како и со претседателот на Собранието Трајко Вељановски за да се најде решение за нивниот иден статус, но немаат одговор од надлежните. Работниците бараат исплата на една или две плати, од вкупно 15 што им доцнат, за можат да ги поминат новогодишните празници. Од синдикатот на ОХИС не веруваат дека ќе успее десетиот тендер кој е во тек, после 9 неуспешни јавни повици.

Претседателот на Синдикатот за идустрија, енергетика и рударство, Пеце Ристовски, во петокот писмено побарал средба со Вељановски, но се` уште не добил повратен одговор. Досега, според вработените, им била понудена само средба со претставници на политички партии, но тие не ја прифатиле, бидејќи мислат дека од неа нема да произлезат конкретни решенија за нив.

„Најголем проблем е што Владата не прифаќа средба со претставници на ОХИС, а доколку се седне на маса и се разговара, сигурно ќе се изнајде некое решение“, вели Ристовски.

Тој соопшти дека прашањето за можните решенија за вработените во ОХИС и во останатите загубари, според одлука на Советот на ССМ, ќе биде поставено на наредната седница на Економско – социјалниот совет. (М.Т.)