Фотогалерија од денешните кавги во Парламентот

За малку беше избегната тепачка во Законодавно-правната комисија, која денска почна да ги разгледува амандманите на буџетот

ФОТО: Киро Попов

Кулминира напрегнатоста во парламентот, каде што веќе неколку седмици се води жестока комисиска расправа за буџетот за 2013 и за амандманите што за него ги поднесоа пратениците. Викенд-расправата за малку ќе излезеше од колосек во текот на вчерашното попладне, односно во почетокот на амандманската расправа во Законодавно-правната комисија.

Малку недостигаше да се случи тепачка меѓу пратениците од власта и од опозицијата, чии претставници се побунија на предлогот за ограничување на дискусиите, на репликите и на можноста за процедурални јавувања ��о Законодавно-правната комисија, со која раководи пратеничката на ВМРО-ДПМНЕ, Благородна Дулиќ. Опозиционерите реагираа и поради интенцијата на владејачките пратеници Законодавно-правната комисија да разгледува и амандмани за кои се' уште не е отворена расправа во матичната Комисија за финансирање и буџет, на чие чело, пак, е Марјанчо Николовски од СДСМ.

Обидот на владејачките партии да ја прескокнат Комисијата за финансирање и буџет и да го протуркаат фискалниот план за 2013 преку Законодавно-правната комисија доведе до судир меѓу пратениците од двата табора. Пратениците од опозицијата станаа од место и го одзедоа микрофонот на претседателката Дулиќ, откако таа не дозволи пауза и ги ограничи процедуралните забелешки на едно јавување. Страстите се смирија откако беше прогласена пауза.

Опозиционерите обвинија дека во параламентот се спроведува украинско сценарио, преку процедурални маневри и ги повикаа пратениците од ВМРО-ДПМНЕ истиот принцип да го применат и со законот за бранители, кој со месеци е заглавен во Комисијата за труд и социјална политика.

Во меѓувреме, се водеше жестока расправа и во Комисијата за финансирање и буџет. Игор Ивановски од СДСМ рече дека власта се обидува работата за буџетот да ја префрли од матичната во Законодавно-правната комисија која, според него, има деловничко право да ги разгледува само поминатите амандмани, без да расправа за тие кои се' уште не се стигнати на ред во матичната комисија.

Силвана Бонева од ВМРО-ДПМНЕ, пак, потенцира дека целта на СДСМ е да го блокира донесувањето на буџетот за 2013 и дека последиците од тоа ќе ги трпат сите граѓани.

Додека внатре пратениците се расправаа, пред вратите на парламентот, атмосферата, исто така, беше напрегната. Група корисници на социјална помош протестираа поради одолжувањето на расправата за буџетот. (А.М.М.)