Поради магла откажани и одложени летови од скопскиот аеродром

Поради магла се откажани слетувањата на скопскиот аеродром Александар Велики од Виена и од Љубљана што беа закажани по полноќ, како и полетувањата од Скопје кон Виена, Љубљана и Загреб. Одложување има на утринските летови од и за Истанбул и Белград, а е реализиран летот кон Бергамо, покажува официјалниот информатор на веб страницата на скопскиот аеродром.

Според Автомото сојузот на Македонија (АМСМ), сообраќајот на сите магистрални и регионални патни правци низ државата се одвива без забрани, пo влажни коловози. Поради врнежите и топењето на снегот можна е појава на одрони на сите патни правци. Се препорачува внимателно управување со возилата и прилагодување на брзината на движење кон условите на патот.

АМСМ препорачува поголема внимателност на патните правци Дебар - Струга, Маврово - Дебар, Катланово - Велес и Демир Капија - Удово каде има почеста појава на одрони кои може да го попречат движењето на возачите. На делниците низ клисурите и на повеќето мостови долж речните текови има појава на утринска магла и се препорачува прилагодена брзина на движење.

Повнимателно управување со возилата е потребно и на магистралниот пат М-1 делница Катланово - Велес, каде се одвиваат работи за реконструкција на патот за што има поставено соодветна сообраќајна сигнализација. Интензитетот на сообраќај на патните правци надвор од градските средини е умерен. На граничните премини нема подолготрајни задржувања за влез и за излез од државата.

АМСМ потсетува дека е во сила законската обврска за поседување на зимската опрема во возилата.