Социјалистите на Чавез победија на регионалните избори

Владејачката Социјалистичка партија на претседателот Хуго Чавез постигна убедлива победа на вчерашните регионални избори во Венецуела, соопшти Централната изборна комисија.

Кандидатите за гувернери на Социјалистичката партија победија во 20 од 23 држави во земјата. На тој начин социјалистите добија уште пет држави, меѓу кои и северозападната Сулија, која е најбогата и најнаселена во Венецуела и е важен центар на нафтениот сектор.

Десната опозиција, која досега контролираше осум држави, победи само во три. Опозицискиот лидер Енрике Каприлес, кој му беше против кандидат на Чавез на последните претседателски избори во октомври, сепак беше реизбран за гувернер на богатата северна држава Миранда со минимална предност од само 0,35 проценти.

Оваа победа е од огромно значење за Каприлес, чија иднина на политичката кариера беше ставена под знак прашање на вчерашните избори.