17.12.2012, 16:02 Музеите се' уште без електронска документација
Повеќе недоследности во заштитата во вонредни услови беа искажани на форумот на „Син штит“ и ИКОМ
На форумот „Заштита на културното наследство во музеите во Македонија - состојби и искуства“ денеска во Кинотека, организиран од македонските национални комитети на меѓународните организации „Син штит“ и ИКОМ, во фокусот се најде превентивната заштита и заштитата на подвижното културно наследство во вонредни состојби, односно низата проблеми поврзани со неа. Според сознанијата на организациите, плановите за заштита на културното наследство во такви услови во поголем дел од институциите не се ревидирани и не кореспондираат со новото време и со новонастанатата ситуација. Јован Ристов од Национален конзерваторски центар - Скопје, говорејќи за нормативна рамка за остварување на потребната превентивна заштита, укажа дека и покрај релативно добрата регулатива, се' уште постојат одредени музејски субјекти со нејасен статус, за кои тешко и се добиваат информации, иако е предвидено заштитата на подвижното културно наследство да ја вршат само јавните музејски установи. Тој посочи и на недоволниот број стручни лица за заштита на културното наследство во вонредни услови, во време на војни, природни непогоди, а го потенцираше и недостигот од потребната опрема за мерење на температурата, влагата и светлината во музејските депоа. Укажа на нефункционирањето на новиот модел на електронско документирање, потенцирајќи дека во одредени национални установи овој процес не е ни започнат.
„Ревалоризацијата на културното наследство не е започната во десет музеи, а во десет музеи, пак, во кои овој процес е завршен, се ревалоризирани 37 музејски збирки со евидентирани 9.805 предмети. Седум од збирките немаат идентификација на бројот на предметите, така што сега државата нема точен број на културното наследство со особено значење“, рече Ристов, кој укажа на низа недоследности во заштитата на наследството во кризни ситуации, како што е недонесувањето на стручните упатства за вработените во институциите (иако пред неколку години е донесена потребната уредба). Плановите за заштита на музејските добра во вонредна состојба ги презентираше Митко Богдановски од Музеи на Македонија, додека стратегиските приоритети во заштитата на музејските добра Крсте Богоески од Институтот за етнологија и антропологија на ПМФ при УКИМ. „Син штит“ и ИКОМ и со овој форум на кој свои предлози и сугестии даваа стручни лица од повеќе институции кои чуваат подвижно културно наследство имаат цел да направат или да ги приспособат своите планови за заштита за да одговорат на предизвиците на денешницата. (К.Б.)
|
