„Зад аголот“ - нов роман на Томислав Османли

Во Салонот 19,19 со почеток во 19,19 часот, вечерва ќе се одржи промоција на новиот роман на Томислав Османли

Во Културно-информативниот центар, во Салонот 19,19 со почеток во 19,19 часот, вечерва ќе се одржи промоција на новиот роман на Томислав Османли, насловен „Зад аголот“. Модератор е писателот Владимир Јанковски, додека за книгата чиј издавач е „Магор“ ќе говорат театрологот Јелена Лужина и филозофот Ферид Мухиќ. Одломки од романот ќе читаат Ивана Атанасова и Маја Лазаревска, а настанот ќе биде збогатен со музички настап на Владимир Мартиновски. Рецензент на делото е писателот Александар Прокопиев.

Ова е роман за играта на судбинското и на случајното. Сложената приказна се преплетува со голем број ликови, перипетии, динамична нарација и промена на вре��ињата и на местата на случувањата. Во неа се меша современоста и историјата, фантастиката и реалноста, длабејќи го наративот за парадоксалниот геометризам на изненадата што демне зад првиот свијок.

Таа го чека и Питагора, древниот мудрец од сјајните антички градови Самос и Кротон, и Никола Кокиновски професор по геометрија од современо Скопје, и младиот надежен, невработен компјутерски експерт Гордан Конев кој електронски се допишува со својот интернет-пријател Џозеф Ковачек, исто така експерт за компјутери, но мобилизиран во НАТО-базата Авијано со задача да ги надгледува и да ги регистрира бомбардирањата на територијата на некогашна СР Југославија...

„Зад аголот“ е монтажно, мултимедиски, филмски, на места и стриповно, ирониски, но и емпатиски, во секој случај крајно возбудливо раскажан роман за играта на судбинското и за случајното; за љубовта и за предавството, за војната и за изневерата, за залудноста на занесните алтруистички проекти и за надвладувањето на егоизмот низ текот на вкупната човекова историја, за носталгијата како отпор кон расточувањето на здржаните вредности, под суровиот удар на новите времиња и системи, за суровиот глобализам и задржувањето на локалниот културен идентитет и повест за спората, продолжена еднодецениска смрт на една голема земја, на еден систем на вредности и цел еден светоглед на неколку генерации - што се одвива на самиот крај од 20 столетие...