„Саем на жена“ - дестинација за современите жени

Уникатниот настан од овој тип ја слави веселата природа на жената, оддава почит на секој аспект од нејзиниот живот – од личниот и семејниот живот, работата, физичката активност и здравјето, па се' до убавината и уживањето, модата, домот, финансиите и претприемаштвото

Лајфстајл-настан, посветен на современите жени во Македонија, годинава со нови и богати содржини, кои по трет пат ќе го разубават животот на секоја посетителка, ќе се одржи од 7 до 9 декември во третата хала на „Скопски саем“. Дестинација за зближување, информација, инспирација и забава.

Уникатниот настан од овој тип ја слави веселата природа на жената, оддава почит на секој аспект од нејзиниот живот – од личниот и семеен живот, работата, физичката активност и здравјето, па се' до убавината и уживањето, модата, домот, финансиите и претприемаштвото. „’Саем на жена‘ е интерактивна платформа на информативни и едукативни предавања, дискусии, демонстрации и работилници, преку кои посетителите ќе се здобијат со нови знаења, идеи, начини и решенија за подобрување на вашиот живот“, велат организаторите од „Омни ивентс“.

Дел од планираните активности и презентации на саемот е „Creative Support и розова ноќ“ (Поддршка на жените оперирани од канцер на дојка). Годинава поддршка за „Creative Support“ ќе дадат модните дизајнерки: Антонија Ристовска, Маја Кикириткова, Мила Кадриу, Елена Љутикова, Олгица Ѓорѓиева, Катерина Попева, Билјана Каран и Силвија Михајловска. Со единствена цел да им се помогне на жените оперирани од карцином на дојка, тие креираа уникатни модели кои ќе бидат понудени на аукција која ќе се одржи вечерва (7 декември) во 19 часот. Во рамките на „Розова ноќ“, која е во организација на „Борка – за секој нов ден“ и „Омни ивентс“, се предвидени предавања на специјалисти за ракот на дојка, неговата дијагноза, превенција, лекување и животот по лекувањето.

Ексклузивно ток-шоу водено од Весна Петрушевска-Бејби на тема „Современата жена во Македонија и сексот“ ќе се случува на 8 декември (сабота) во 19 часот. Предвидени се и голем број модни ревии на македонски дизајнери – колекција есен/зима 2012/2013, кои се резервирани за терминот 9 декември (недела), во 17, 30 часот на главната сцена на „Саем на жена“. Дел од активностите на манифестацијата се и промоција на најновите трендови за коса 2012/2013 и развој на фризерските салони, еколошка работилница за реупотреба на материјали, мејк-овер сцена и други содржини.