07.12.2012, 15:46 ВМРО-ДПМНЕ и СДСМ во клинч поради пензионерите
Кој ја блокира работата на собраниската Комисијата за труд и социјална политика, кој го доведува во прашање покачувањето на пензиите и социјалната помош и кој е виновен за хаосот во работата на парламентот и денеска беа главните прашања околу кои се препукуваа ВМРО-ДПМНЕ и СДСМ. Координаторката на пратениците на ВМРО-ДПМНЕ, Силвана Бонева ги обвини социјалдемократите дека се обидуваат да внесат хаос не само во работата на Собранието, туку сакаат негативните реперкусии од тоа да ги почувствуваат сите граѓани во државата, како пензионерите, социјалните случаи и бизнис секторот. Ваквите тврдења СДСМ ги оцени како лицемерие и побара одговорноста за блокадата на парламентот да се побара во ВМРО-ДПМНЕ и во ДУИ.
„Комисијата за труд и социјална политика е блокирана исклучиво заради договорениот политички хаос на владините партнери, кои за дневно политички потреби глумат патриотизам, а за нивната испазарена блокада наивно се обидуваат да ја префрлат топката да ја обвинат опозицијата“, порача вчера Цветанка Иванова, претседателка на Комисијата за труд и социјална политика, каде треба да се разгледаат 15.000 амандмани на законот за бранители што ги поднесе ДУИ. Таа додаде дека владејачкото мнозинство е на страната на ВМРО ДПМНЕ и кај нив е целосната одговорност за работата на оваа Комисија.
Иванова денеска писмено го известила претседателот на Собранието Трајко Вељановски дека нема да закаже нова седница на Комисијата, се додека владините партнери не го одблокираат носењето на законот за бранители.
Наспроти тоа Бонева тврди дека СДСМ ги злоупотребува позициите во Собранието при водењето на клучните собраниски комисии, Комисијата за финансирање и буџет и Комисијата за труд и социјална политика, ги крши сите деловнички и правила стекнати со парламентарната пракса, затоа што имаат политичка наредба од Бихаќка да не се усвојуваат позитивните мерки за граѓаните на Република Македонија.
„Во Комисијата за труд и социјална политика не сакаат да се донесе и да се стави точка на дневен ред законот за пензиско и инвалидско осигурување, со кои што се предвидува 5 проценти зголемување на пензиите. Со законот за социјална заштита, кој што исто така не сакаат да се стави на дневен ред, се предвидува вработување на лица кои што до 18 години имале статус на деца без родители. Се предвидува и зголемување на социјалната помош за пет проценти. Одговорноста за последиците од ваквото постапување индивидуално ќе ја сносат не само одговорните на комисиите, туку и СДСМ кој работи спротивно на интересите на сите граѓани на Македонија“, смета Бонева. (Т.П.)
|
