Грција стави рампа за „македонски“

Атина се' уште го разгледува предлогот на посредникот Метју Нимиц од пред три недели

Од нашиот дописник
Миркица Поповиќ

Атина - Главна тема за која се преговара е спорот за името, но во рамки на преговорите се вклучени и други работи. Вака од грчкото Министерство за надворешни работи објаснуваат дали се дискутира и за користење на придавките македонски, македонска, македонско, за кои пред неколку дена грчкиот заменик-министер за надворешни, Димитрис Куркулас, истакна дека се неприфатливи за Грција.

Како што потенцираше портпаролот Григорис Делавекурас, суштинскиот предмет на преговорите, како што е одредено во Привремената спогодба и со одлуките на Советот за безбедност, е наоѓањето заеднички прифатливо решение за името. „Јасно е дека во рамки на преговорите се дискутираат и други работи, но суштински е наоѓањето решение за спорот за името“, истакна Делавекурас. Што се однесува до придавките македонски, македонско, според Делавекурас, грчката позиција е дека користењето на овие придавки е во директна поврзаност со спорот за името. „Позицијата на Грција во сите меѓународни организации во кои учествува е јасна - не треба да се користат овие термини“, потенцира Делавекурас.

Од грчкото МНР велат дека, сепак, целта на Грција е да се стигне до конечно решение, меѓутоа дека за тоа е неопходна политичка волја. Делавекурас нагласи дека во изминатите години Грција презела голем број иницијативи за да се постигне напредок во преговорите. Како последна и најважна го спомена меморандумот за разбирање, кој за грчката страна содржи јасна рамка и параметри што треба да се почитуваат за да се дојде до решение. „За жал, одговорот што го добивме од поранешната југословенска Република Македонија не содржи никаква суштина. Добивме одговор во кој нема суштински одговор на конкретната рамка која ја предложи Грција“, констатира Делавекурас.

Како што додаде, Грција останува на ставот дека сака да види напредок во преговорите, затоа што решавањето на спорот не само што ќе биде од корист на двете држави, туку е и важно за регионалната стабилност. „Решавањето на спорот ќе биде конкретен доказ на добрососедските врски и ќе ја поттикне евроатлантската перспектива на поранешната југословенска Република Македонија“, посочи портпаролот. Инаку, Атина се' уште ги разгледува предлозите доставени од медијаторот Метју Нимиц на трилатералната средба со македонскиот и грчкиот преговарач во Њујорк.

На помалку од една недела пред самитот на ЕУ, на кој треба да се одлучува за датумот за почнување преговори за Македонија, во медиумите речиси и нема интерес за оваа тема. Фокусот е завртен кон затегнатите грчко-албански односи по изјавите на албанскиот премиер, како и на загриженоста за порастот на национализмот во некои од балканските држави. Загриженост за овој феномен директно на НАТО-самитот во Брисел испрати и шефот на грчката дипломатија, Димитрис Аврамопулос, кој од Брисел заедно со пораката до Македонија дека нема да има попуштање и мора да се исполнат сите критериуми и предуслови за да се отворат вратите на НАТО и на ЕУ за нашата држава.