06.12.2012, 16:07 Вељаноски ќе ги спасува пензионерите од бранителите
Претседателот на Собранието денеска писмено ја информираше Иванова за својата намера да ја деблокира работата на Комисијата, која поради законот за бранители не разгледува други владини предлози
Претседателот на Собранието Трајко Вељаноски ќе закаже комисиска расправа за владиниот предлог за покачување на пензиите и за социјалната помош, доколку тоа до утре не го стори претседателката на Комисијата за труд и социјална политика Цветанка Иванова. Тој денеска писмено ја информираше Иванова за својата намера да ја деблокира работата на Комисијата, која поради законот за бранители не разгледува други владини предлози.
Реакцијата на Вељаноски следува по обвинувањето од пратениците од ВМРО-ДПМНЕ дека Иванова ја кочи работата на Комисијата, поради што не може да се разгледаат законите за покачување на пензиите и на социјалната помош. Наспроти овие обвинувања, од СДСМ тврдат дека ВМРО-ДПМНЕ и Вељаноски манипулираат и порачуваат тие да ја преземат одговорноста за законот за бранители.
„Со закажувањето на седница на Комисијата Вељаноски само ќе направи тоа што не функционира, да функционира“, кратко објаснуваат од неговиот кабинет.
Во писмениот допис Вељановски подвлекува дека Иванова ги пропуштила сите рокови за закажување комисиска седница за законите што ги доставила Владата.
Иванова и денеска остана на ставот дека не планира да ја прекине работата на Комисијата по законот за бранители, за да закаже нова седница. Таа повтори повтори дека нема да закаже комисиска седница за пензиите и за социјалната помош, бидејќи ВМРО-ДПМНЕ ја обвинувале дека не е ефикасна, поради што решила расправата за бранителите да трае се' додека целосно не биде завршена.
„Доколку Вељаноски закаже седница, тогаш тој ќе ја преземе целата одговорност и за законот за бранители. Тој ќе треба да ги продолжи и седниците за бранителите“, вели Иванова.
Денеска и министерот за труд и социјална политика Спиро Ристовски и Сојузот на здруженија на пензионери координирано ја повикаа Иванова да свика седница на матичната Комисија за да расправа за законите, кои како што велат е во интерес на 280.000 пензионери и на 40.000 социјални домаќинства.
„Би апелирал СДСМ да ги надмине своите политички интереси и да ја продолжи расправата по однос на Законот за бранители, но истовремено претседателот на Комисијата да закаже седница за законите од кои бенефит ќе имаат стотици граѓани“, изјави Ристовски. (Т.П.)
|
