Ристовски апелира да заседава Комисијата за труд и социјала

Кон повикот на министерот се приклучија и пензионерите кои бараат да се откочи работата на Комисијата, за да се усвои воредното зголемување на пензиите


Министерот за труд и социјална политика Спиро Ристовски денеска апелираше претседателката на собраниската Комисија за труд и социјална политика од редовите на СДСМ да свика седница на која би се разгледале повеќе закони од трудовото право меѓу кои и Законот за пензиското и инвалидското осигурување со кој треба да се овозможи мартовското зголемување на пензиите најавено од Владата.

- Вчера бевме сведоци на една политичка комуникација меѓу мојата матична партија и опозициската СДСМ. Би апелирал и замолил во интерес на 280.000 пензионери и 40.000 социјални домаќинства коишто го очекуваат зголемувањето на пензиите и социјалната парична помош, СДСМ да ги надмине своите политички интереси и да ја продолжи расправата по однос на Законот за бранители, но истовремено претседателот на Комисијата да ја закаже работата на следната седница на Комисијата затоа што ова се закони од кои бенефит ќе имаат стотици граѓани, изјави Ристовски, одговарајќи на новинарско прашање по денешната трибина за зајакнувањето на социјалниот дијалог во државата.

Ристовски нагласи дека на оваа седница на Комисијата освен законите поврзани со пензиите и социјалната парична помош, треба да бидат разгледани и Законот за работни односи со кој се регулира заштитата на мајките родилки, како и законот за привремени вработувања.

Седуммина пратеници од ВМРО-ДПМНЕ и од ДУИ, членови на Комисијата за труд и социјална политика, испратија барање до претседателката Цветанка Иванова за свикување седница на чиј дневен ред би биле ставени девет закони.

Претседателката на Комисијата, Иванова вчера изјави дека нема намера да свика нова седница на собраниското тело се додека не заврши разгледувањето на над 15.500 амандмани за Законот за бранители.

Доколку Иванова писмено не одговори на барањето или доколку воопшто не одговори, деловнички постои можност седницата да ја свика претседателот на Собранието.

Пензионерите бараат да се откочи работата на Комисијата, за да се зголемат пензиите

Сојузот на здруженија на пензионери на Македонија смета дека треба да се најдат начини да се одблокира работата на собраниската Комисија за труд и социјална политика за да може да се усвои законското решение кое треба да овозможи воредно зголемување на пензиите. Во спротивно, велат оттаму, може да биде доведено во прашање договорот што пензионерите го постигна низ повеќемесечен дијалог с�� Владата.

- Нашиот Сојуз како репрезентативен претставник на интересите на пензионерите низ дијалог со Владата договори вонредно линеарно зголемување на пензиите за 5 проценти што ќе значи зголемување на најниските пензии и до 12 насто. Тоа зголемување треба да уследи во март 2013 година, заедно со процентот на системското усогласување на пензиите за сите пензионери. Одлагањето да се разгледува овој законски проект во Комисијата за труд и социјална политика значи опасност од одолговлекување на усогласувањето на пензиите на 280.000 пензионери, рече на денешната прес-конференција претседателот на Сојузот на здруженијата на пензионерите на Македонија, Драги Аргировски.

Додаде дека не смее да се дозволи неколкумесечниот дијалог што се водел со Владата да падне во вода и да биде залуден. Затоа, рече, апелираме да се откочи работата во Собранието и да се стави на дневен ред предлог-законско решение за покачување на пензиите.

- Значи, очекуваме од сите политички фактори целосна поддршка на договореното покачување на пензиите и без одлагање да се стави на дневен ред предложеното законско ре��ение, рече Аргировски.

Тој нагласи дека исто така треба да се забрза и донесувањето на посебниот Закон за пензионерско организирање во Македонија, кој, како што рече, е многу битен за заштита и унапредување на работата на Сојузот и на здруженијата на пензионерите во целина, за создавање поквалитетен, содржаен, активен, здрав и достоинствен живот во третата доба.