14.12.2012, 16:02 Граѓаните на БиХ и на Албанија најсиромашни во Европа
Според истражувањето на Агенцијата за статистика на Турција, Босна и Херцеговина и Албанија имаат најмала куповна моќ во Европа.
Во истражувањето е земен бруто домашниот производ (БДП) по глава на жител, мерен според паритетот на куповната моќ.
БДП по глава на жител во БИХ во 2011 година изнесувал 30 отсто од европскиот просек, како и во Албанија, што е најнизок во Европа. Но, во случајот на БиХ е забележан пад на овие индикатори, додека во Албанија раст. Од другите земји на Југоисточна Европа највисоко котира Хрватска, чиј БДП изнесува 61 отсто по глава на жител, а потоа следуваат Црна Гора со 42 отсто и Македонија и Србија со по 35 отсто БДП.
Најголем БДП по глава на жител е забележан во Луксембург, 271 процент од европскиот просек, а потоа следуваат Норвешка (186), Швајцарија (157), Холандија (131), Ирска (129), како и Австрија и Шведска (127).
БДП на Словенија изнесува 84 отсто од европскиот просек, а по нив се Словачка (73), Унгарија (66), Турција (52) и Романија со 49 отсто.
Бруто домашниот производ според паритетот на куповната моќ се смета за еден од најрелевантните индикатори за богатството на граѓаните на одредена држава.
Постојат големи разлики во животниот стандард на граѓаните меѓу земјите членки на Европската унија. Така, стандардот на граѓаните на Луксембург минатата година беше за околу шест пати поголем од оној на Бугарија и на Романија. (Ек.Р.) |
