(ФОТО) Тесна победа на МЗТ против Крка



Во натпревар во кој имаше многу грешки и слаб процент на шут, „металците“ стигнаа до седмиот триумф (92:88) во АБА лигата

ФОТО: Петр Стојановски

Кошаркарите на МЗТ Скопје Аеродром забележаа победа над Крка со 92:88 (20:20, 21:19, 28:26, 28:28), во 13-то коло во АБА лигата. „Металците“ до седмата победа во регионалната конкуренција, стигнаа во натпревар, во кој одбраните беа ставени во втор план.

МЗТ имаше можност многу порано да го реши прашањето на победникот, но во третиот период играчите на Алеш Пипан испуштија предност од 11 поени.

„Знаевме дека ќе биде тежок натпревар, Крка е квалитетен противник. Имаме многу проблеми со повредени играчи, на тренинзите не има само осуммина, затоа им  честитам на играчите за борбеноста и победата“, рече тренерот Пипан.

Слободните фрлања остануваат голем проблем за МЗТ. Во последните секунди тие промашија четири од шест, а вкупно промашија 15 слободни фрлања. Сепак, добриот шут за тројка во второто полувреме им овозможи на „штрковите“ да слават.

Македонскиот првак до победата го предводеше Дамјан Стојановски кој мечот го заврши со 26 поени и 7 скокови. Голем придонес во играта на МЗТ дадоа и Тодор Гечевски (21 поен, 9 скока, 3 асистенции) и Никола Оташевиќ (13 поени, 8 асистенции, 4 украдени топки).

Домен Лорбек со 19 поени беше најекспонираниот играч на Крка на овој натпревар.

МЗТ следниот натпревар во АБА лигата ќе го одигра веќе во вторник, кога во Скопје ќе гостува Цибона.