Никси ја продолжија мизеријата на Лејкерси

Кармело Ентони во првата четвртина постигна 22 коша од вкупно 30, доволни за триумф над „езерџиите“ од 117:106

Ништо ново кога се во прашање екипите на Њујорк Никс и Лос Анџелес Лејкерс. Едните и натаму импресионираат со својата форма, а другите и натаму се прашуваат како да излезат од очајната форма сезонава. Двата тима во својот меѓусебен двобој влегоа во обид да прекинат и продолжат серија. Никси супериорни на домашен терен во досегашниот дел од шампионатот, деветти пат славеа во својот „Медисон сквер гарден“, додека пак Лејкерси го забележаа, малку неверојатно, четвртиот последователен пораз.

Конечните 117:106 се одраз на одличната игра на Кармело Ентони, во првата четвртина од мечот постигна фантастични 22 поени од вкупните 30. Најголемата звезда на Никси во стартните 12 минути погоди осум од девет обиди од поле, што беше доволно за предност од 41:27. Со тоа само се потврди констатацијата дека одбраната е голем проблем за новиот тренер на Лејкерси, Мајк Дантони. Само повредата на зглобот на Ентони во третата четвртина го спречи суперстарот да стигне до уште поголема бројка на поени, од овие 30, кои и вака беа доволни за победа.

Според американските медиуми, Ентони е првиот играч кој постигнал 30 поени за помалку од 22 минути, а последен на кого тоа му успеа е Дејвид. Одлична партија на овој меч прикажа Рајмонд Фелтон, постигнувајќи 19 поени и осум асистенции, а по еден помалку додадоа Тајсон Чендлер и Џеј Ар Смит. Кај Лејкерси како и обично Коби Брајант најдобар со 31 поен, десет скока и шест асистенции.

Во моментов Њујорк е најдобриот тим на Истокот во моментов со скор од 19 победи и четири порази, а откако е Вудсон тренер Никси имаат само еден пораз во 21 меч на домашен терен. Од друга страна, Дантони не може да се пофали со светли моменти во кариерата во моментов, по неговото доаѓање „езерџиите“ имаа скор од четири победи и девет порази. Со скор 9/14 во моментов Лејкерси не се на позиција која води во плејофот.

До десеттата победа сезонава тимот на Портланд дојде на доста убав начин.Со 98:90 е совладан лидерот на југозападната конференција и вториот во збирниот пласман на западот, тимот на Сан Антонио. Предводник на тимот на Портланд во овој триумф беше сезонава одличниот дебитант Демиан Лилард, кој постигна 29 поени и седум скока. Лилард во текот на целиот меч водеше доста интересна битка со ветеранот Тони Паркер, кој на крајот мораше да го признае поразот. Французинот постигна 21 поен.

„Можеме оваа ситуација да ја окарактеризираме како замор или, пак, едноставно да кажеме дека не можевме да пронајдеме ритам во играта. Секако, за триумфот се заслужни и самите Блејзерси, кои ги погодија потребниот број на удари и ја одржуваа предноста“, изјави ветеранот Тим Данкан, кој мечот го заврши со 16 поени.

Атланта ја продолжи победничката серија, без проблем го доби Шарлот со 113:90.