Мешаница во трката за „Оскар“

Најмногу награди на американските критичарски здруженија освои филмот на Кетрин Бигелоу „Нула темнина триесет“

Сунчица Уневска

Оскаровската трка оваа година, кога наградите ќе се доделат 85. пат, се очекува со големо нетрпение бидејќи листата на фаворити стана поголема од вообичаено и донесе една сосем необична ситуација. На оваа листа се најдоа барем седум или осум филма што имаат големи можности да ги добијат номинациите во сите главни категории. Тоа го потврдија и номинациите за „Златен глобус“, но и фаворитите на американските критичарски здруженија, врз основа на кои во првата борбена линија се најдоа: „Нула темнина триесет“ на Кетрин Бигелоу, „Учителот“ на Пол Томас Андерсон, „Љубов“ на Михаил Ханеке, „Линколн“ на Стивен Спилберг, „Во добро и во зло“ (Silver Linings Playbook) на Дејвид О. Расел, „Клетници“ на Том Хупер, „Арго“ на Бен Афлек и „Животот на Пи“ на Анг Ли, а тука е и дебито на Бен Зеитлин „Ѕверови од Јужната дивина“.

Имено, самото избивање на прво место на историската драма на Стивен Спилберг „Линколн“, која поведе во трката за „Златен глобус“ со седум номинации, беше големо изненадување. Оваа награда, која ја доделуваат странските новинари во Холивуд, му ја даде предноста на „Линколн“, филмот кој, од друга страна, не ги доби гласовите на американските критичарски здруженија. Најстарото од нив, Националното здружение на филмски критичари за најдобар филм го прогласи „Нула темнина триесет“ на Бигелоу, а истото се случи и со Њујоршкото здружение, со Бостонското, како и со здружението во Вашингтон. Додека Здружението на критичари од Лос Анџелес за најдобар филм го избра „Учителот“ на Андерсон, давајќи му дури четири награди. „Линколн“ главно ги доби гласовите за улогите на Дениел Деј Луис и Сели Филд, а две здруженија му доделија и награда за сценарио.

Во трката за „Златен глобус“ овој филм поведе добивајќи и три номинации за улоги, за главната на Дениел Деј Луис и двете споредни на Сели Филд и Томи Ли Џонс. Додека номинациите во главните категории: за филм, за режија и за сценарио, ги добија сите очекувани осум филма, заедно со годинешното изненадување „Побегнатиот Џанго“ на Квентин Тарантино. Самото тоа ја прави трката многу интересна, затоа што оваа година и оние кои имаат по пет номинации, како „Арго“ и „Побегнатиот Џанго“, и оние со четири номинации, меѓу кои се „Нула темнина триесет“, „Во добро и во зло“ и „Клетници“, па дури и со три, каде што се „Животот на Пи“ и „Учителот“, се на некој начин изедначени.

Необично годинава е и што самите критичарски здруженија имаа доста различен избор. Единствен филм кој секаде доби награда, е францускиот „Љубов“ во режија на Михаил Ханеке. Но, не само во категоријата на странски филм, туку често и како најдобар филм, па многумина очекуваат дека е можно тој да влезе и во главната оскаровска трка. Што се однесува до другите, филмот на Кетрин Бигелоу доби голема поддршка од критичарите. Ова остварување, кое го следи десетгодишниот лов по најголемиот терорист Осама бин Ладен, доби по три награди на споменатите здруженија, и тоа за најдобар филм, режија и за улогата на Џесика Честеин, како млад офицер на ЦИА. Но, веднаш до него, на врвот на листата се наоѓа и филмот „Учителот“.

Ова остварување годинава се сметаше и за морален победник на „Венецискиот филмски фестивал“, каде што ја доби наградата за режијата на Пол Томас Андерсон, но и за улогите на Жоакин Феникс и на Филип Сејмур Хофман. „Учителот“ беше прогласен и за најдобар филм за 2012 година според изборот на сто филмски критичари, а во Америка здружението на Лос Анџелес го прогласи за свој фаворит доделувајќи му ги наградите за најдобра режија, за улогите на Жоакин Феникс и Еми Адамс, како и за продукциски дизајн.

Кога зборуваме за изборот на критичарите, кој исто така се смета за голем показател за оскаровските фаворити како и „Златниот глобус“, да кажеме дека на овие листи филмот „Арго“ на Бен Афлек, кој се осврнува на вистински настани околу заложничката криза во Иран во 1980-тите години, главно ја добиваше наградата за сценарио. Кај „Златните глобуси“, пак, тој доби дури пет номинации. На листите на критичарите избија уште два интересни филма.

Првиот е „Во добро и во зло“, беше исто наградуван за сценарио, но и за улогата на прекрасната млада актерка, Џенифер Лоренс. Овој филм очекувано доби четири номинации за „Златен глобус“. Но, не беше таква ситуацијата и со „Ѕверови од Јужната дивина“, инаку лански победник на познатиот независен фестивал „Санденс“, кој доби многу награди на критичарите како најдобро деби на Бен Зеитлин, во кој исто така најдобра дебитантска улога дава 9-годишната Кувензејн Волис, на која сите и' предвидуваат „Оскар“. Но, овој филм не влезе во трката за „Златен глобус“.

Сепак, она што е интересно е фактот дека годинава номинациите за „Оскар“ се поместени дури две недели понапред, па тие ќе бидат објавени пред доделувањето на наградите „Златен глобус“. На тој начин некако и се намалува влијанието на овие награди, за кои се сметаше дека се најдобар показател за претстојните „Оскари“. Овој пат, номинациите ќе ги дознаеме уште на 10 јануари, со што добитниците на „Златни глобуси“, кои ќе бидат доделени на 13 јануари, ќе изгубат доста во поглед на интересот што владееше за нив. Оваа година поразлично е и тоа што најатрактивните филмски наслови доаѓаат од големите студија, а не од независните продукции, што беше случај последните години. Сите тие нешта, како и силните филмски остварувања годинава ја прават трката уште понеизвесна и поинтересна, а за нас дополнително и поради нашиот кандидат во трката за номинации за странски филм, „Трето полувреме“ на Дарко Митревски.