Спектаклот „Животот на Пи“ во „Синеплекс“

„Визуелно, филмот на Анг Ли е мало ремек-дело во поглед на сликата“, изјави Кристијан Даниловски од студиото ФХ3Х, кое работеше на филмот

Спектакуларниот филм на Анг Ли „Животот на Пи“ направен во 3Д- технологија, на кој работеа и македонските артисти од студиото ФХ3Х, од денеска ќе игра во киното „Синеплекс“.

„Животот на Пи“ беше прикажан на отворањето на киносалите „Синеплекс“, а од денеска почнува неговата редовна дистрибуција. Станува збор за еден магичен авантуристички филм, кој се одвива насред Пацификот. Приказната го следи младиот Пи Пател, кој заедно со неговото семејство во раните 1970-ти години ја напуштаат Индија и заминуваат за Канада во потрага по нов почеток. Таткото на Пи е чувар на зоолошка градина, па на б��одот со нив се наоѓаат и животни, што семејството планира да ги продаде за да создаде одреден капитал. Но, по една страшна бура бродот ќе потоне и Пи ќе се најде сам, опколен со вода и со раздразливиот бенгалски тигар Ричард Паркер.

Според пишувањето на светските критичари, „Животот на Пи“ е вистински спектакл, кој се смета за еден од фаворитите во претстојната трка за „Оскарите“. Многу од критичарите не штедеа зборови нарекувајќи го ова остварување „визуелно чудо“, „спектакуларен свет на чуда“ и истакнувајќи дека „Анг Ли успеал да го направи невозможното“.

Филмот е направен според романот на познатиот канадски писател Јан Мартел, кој не можел да се екранизира се' додека во последниве години не се усовршила технологијата. А, како што велат од екипата, ова е филм кој можел да го изведе единствено оскаровецот Анг Ли („Прикриен тигар, скриен змеј“, „Кршенгрб Планина“, „Разум и чувство“, „Ледена бура“). „Во поглед на технологијата употребена за визуелните ефекти, ’Животот на Пи‘ е на самиот врв, барем во споредба со филмовите кои ќе излезат оваа година“, вели Кристијан Даниловски, извршен продуцент во ФХ3Х, додавајќи дека визуелно, филмот е извонреден и претставува мало ремек-дело во поглед на 3Д-сликата.

Интересно е дека ликот на Пи Партел го игра дебитант, 17-годишниот Сурај Шарма, кого Анг Ли го избрал на аудиција помеѓу 3.000 пријавени кандидати. Освен Шарма, во филмот играат и Жерар Депардје, Табу и Адил Хусеин, а возрасниот Пи го игра Ирфан Кан, познат по улогата на полицискиот инспектор во филмот „Милионер бездомник“. (С.У.)