Премиера на мјузиклот „Македонска крвава свадба“

Македонската битова драма ја потпишува Сташа Зуровац, а во неа учествуваат дури 39 актери

Сунчица Уневска

В недела во 20 часот во Драмски театар во Скопје ќе се одржи премиерата на новата постановка на драмата „Македонска крвава свадба“, но овој пат како музичка драма или мјузикл кој го потпишува гостинот од Хрватска, режисерот и кореограф Сташа Зуровац. Веќе самото ова и' дава сосем поинаква димензија на оваа драма, во која учествуваат дури 39 актери, која, од една страна, се потпира на музиката и песните што во себе го носат битот на македонскиот народ, но, од друга страна, многу лесно успева да ја премине границата и која, по се' изгледа, на сцената на Драмски театар ќе донесе своевиден спектакл.

„Самиот наслов на оваа драма, која во својот нуклеус ја носи македонската крвава свадба, за мене беше голем предизвик што ја разбуди мојата креативност“, изјави Сташа Зуровац на вчерашната прес-конференција, додавајќи дека ова дело има фантастична структура и дека било големо задоволство да се работи на него. Впрочем, и самиот пристап што го носи жанровски ова дело многу понапред, дава можност за далеку поголема креација, но и за пренос на енергијата низ неа.

Претставата е направена според сценариото на Славко Јаневски за филмот „Македонска крвава свадба“ и според драмскиот текст на Војдан Чернодрински, но, како што објасни Зуровац, кога тој својата замисла му ја дал на композиторот Марјан Неќак, кој имал целосна слобода во подготовката на музиката, и самиот бил изненаден. „Наеднаш имав чувство дека се соочив со сопственото дело на еден сосем поинаков начин, па сето тоа ми стана уште поголем предизвик“, додаде Зуровац. Имено, во процесот на работа се' тргнало од музиката, што е и нормално, бидејќи таа е овде подлога на се'. А кога неа и ја добил, тогаш Зуровац сето претходно замислено морал да го погледне на поинаков начин.

„Многу е тешко од хит-претстава да направите нов хит. На крајот добивме петнаесетта димензија од првично замисленото“, но според реакцијата на режисерот и на многубројните актери кои беа присутни на прес-конференцијата, тие се исклучително задоволни од ова смело жанровско дело. Како што додаде и директорот на Драмски театар, Бранко Ѓорчев, оваа постановка на „Македонска крвава свадба“ е несекојдневен проект кој освојува нови простори.

Што се однесува до стиховите и музиката, користени се македонските народни песни, како и песните на Кочо Рацин и на Петре М. Андреевски. „Битовата драма е она што сме ние. Многу е убаво да се потсетиме од каде сме и кои сме“, изјави Марјан Неќак, потенцирајќи дека битовата драма е она од што нашите театри треба да тргнат. За него, таа е нешто непроменливо и непресушно, огромна инспирација, на која смета дека треба да се работи со искрен и едноставен пристап.

Главните улоги на Цвета, Спасе и Осман-бег ги играат Јана Стојановска, Жарко Димоски и Игор Ангелов. Но, она што директорот Ѓорчев го потенцира е дека оваа претстава се разликува и по кастингот, бидејќи во неа е направен еден несекојдневен генерациски спој. Тука се искусните актери: Гоце Тодоровски, Ѓокица Лукаревски, Диме Илиев, Викторија Анѓушева, Виолета Шапковска, Ѓорѓи Тодоровски, Анастас Тановски, односно споени се различни генерации, од повозрасните, па се' до најмладите актери. Во претставата учествуваат и млади игроорци, кои режисерот Зуровац ги нарече вистински играчи, сосем рамноправни со останатите, а кои доаѓаат од училиштето „Илија Николовски-Луј“, на насоката за традиционална музика и игра, и од Универзитетот „Гоце Делчев“ во Штип, од катедрата за етнокореологија.

„Ова е претстава која го анимира целиот театар, додаде Бранко Ѓорчев, и претстава која ја брише границата меѓу сцената и публиката“. Таа е едукативна и забавна, а пред се', тие се надеваат и дека ќе биде привлечна за публиката, односно дека ќе се претвори во голем хит.