Сме изеле тон и пол отровно пченкарно брашно

Околу 1,5 тон или три до четири проценти од српското брашно со микотоксини дистрибуирано по македонските маркети во пакувања од 500 и 750 грама завршило кај потрошувачите и најверојатно е употребено за човечка исхрана и за изработка на пекарски производи. Според директорот на Агенцијата за храна и ветеринарство Дејан Рунтевски, останатите осум тони се веќе повлечени од промет. Тој најави дека ќе има казни ако се утврди вина кај увозниците на брашното, иако засега податоците велат дека пратките се стигнати со валидни резултати за исправност од Србија што потврдуваат дека брашното било во ред.

„Надлежните српски служби треба да ни кажат зошто резултатите од анализите покажале отсуство на афлатоксин, дали во моментот кога биле земени мострите брашното било исправно со оглед дека количеството афлатоксини се зголемува во случај на несоодветно складирање. Значи, можно е анализите да биле негативни, а во меѓувреме, во брашното да се покачиле вредностите на микототксините ако чувањето не било како што треба“, рече Рунтевски.

Тој посочи дека контаминираната пченка од Србија не е искористена за производство на домашни смоки или палента. За да ги засили контролите, Агенцијата издаде и наредба до граничните инспектори, да се забрани пуштањето во промет на секоја пратка пченкарно брашно наменето за човечка исхрана додека не се добијат резултатите од анализите за исправност. (Ек.Р.)