Американската армија отпушта дебели војници

Петнаесет пати повеќе војници се отпуштени оваа година од американската армија поради вишок килограми, објави „Вашингтон пост“.

Со оглед дека има се повеќе регрути кои се неспособни за служење во армијата заради дебелина, државата тоа го оценува како проблем од национална безбедност.

За да се намали потрошувачката, американската армија почна да отпушта свои припадници, а први се оние кои не успеале на тестот за физичка подготвеност заради дебелина. Во изминатите десет месеци поради тоа, отпуштени се 1.625 војници, наведува весникот.

Бројот на дебели војници во изминатите 15 години е тројно поголем.

Во 2010 година, според официјални податоци од армијата, 86.186 (5,3 отсто) војници имале барем една дијагноза поврзана со зголемена тежина. Најмногу војници со вишок килограми имало меѓу жените постари од 40 години. Се покажало дека маринците и други војници помлади од 20 години се во најдобра форма.

Порастот на војници со прекумерна тежина ги алармирал надлежните и приморал да се ревидираат тренинг-програмите.

Војници тврдат дека тестирањата се премногу напорни и поради тоа силни и здрави војници неправедно остануваат без работа. Блогови и форуми се полни со реакции на војници и нивни роднини кои упатуваат критики за новата политика на американската армија тврдејќи дека државата ги третира како „неупотребливи“.

Пензионираниот генерал-полковник Марк Хертлинг изјави дека во 2009 година 75 отсто од цивилите кои сакале да влезат во армијата, биле одбиени заради прекумерна телесна тежина.