13.12.2012, 15:31 Бошкоски: „Ослободете ги вработените во МВР, не се виновни“
Порашениот министер за внатрешни работи три часа даваше одбрана за убиствата на Марјан Тушевски и Киро Јанев
Љубиша Станковиќ
„Ценет суде, ве молам како човек, овие луѓе, кои се наоѓаат на она што се нарекува обид за обвинение, да ги ослободите. Тие ниту го прекршиле правилникот, ниту законот, а не го прекриле ниту нивните надредени“, му се обрати денеска на судскиот совет во „кривичниот суд“ во Скопје, Љубе Бошкоски, еден од обвинетите во процесот наречен „Ровер“.
Тој денеска три часа давеше одбрана за случајот со убиството на Марјан Тушевски и Киро Јанев извршено пред повеќе од 11 години во центарот на Скопје, за кое е обвинет за помагање.
Во своето три часовно сведочење Бошкоски рече дека од сите обвинети го познава само Зоран Трајковски, бидејќи во времето кога тој бил министер за внатрешни работи, тој бил шеф на неговото лично обезбедување. Бошкоски рече дека не постои човек кој ќе потврди дека тој некому нешто наложил и наредил да постапи спротивно на законските прописи.
Бошкоски побара од судот процесот да добие еден поинаков тек, односно да биде запрено се' до моментот додека не се обезбедат лицата обвинети за убиството кое се случи во летото 2001 година. На прашањето од судот за негово евентуално познанство со покојниот Тушевски, Љубе Бошкоски рече дека го запознал преку Пане Велев, тогашен директор во МВР, кој му кажал дека Тушевски е ангажиран од екс-министерката Доста Димовска и од покојниот претседател Борис Трајковски како обезбедување за време на изборната кампања.
„И тогаш, за жал, како и денеска се ангажираа такви луѓе. Проблемот се јавува по победата на изборите кога тие луѓу бараат посебен третман и знаат да ја злоупотребуваат“, рече Бошкоски и појасни дека Орце Коруновски го запознал во 1999 година кога на Граничниот премин Деве Баир се сретнал со Тодор Петеров, лидер на Светскиот македонски конгрес.
Според кажувањето на Бошкоски, Петров го претставил Коруновски како каратист и негово лично обезбедување, но и тоа дека Тодор Петров бил кум во семејството на неговата сопруга. „Никогаш не сум соработувал со Коруновски, ниту, пак тој учествувал во изборна кампања, а да биде ангажиран од мене“, посведочи Бошкоски.
|
