Брисел не ја дели разочараноста

Во Европската комисија веруваат дека во јуни Македонија ќе добие датум и дека заклучокот од самитот вчера и денес ја отвора вратата за тоа

Од нашиот известувач
Слободанка Јовановска


Брисел – Во Брисел не ја делат разочараноста во Македонија и, според оценките овде, евроинтеграцијата на Македонија почнува да се движи и следниот, веројатно јунски самит, нема да биде без датум за преговори.

„Го добивме тоа што го сакавме“, велат извори од Европската комисија, нагласувајќи дека било важно процесот да почне да се движи и дека тоа по овој заклучок ќе се случува.

Според овие извори, ова што е содржано во заклучокот е остварување на најавата „датум за датум“, а покрај тоа еврокомесарот Штефан Филе добил и согласност од земјите членки за временскиот распоред на одлуки, за што е отворен простор со играта со зборови во заклучокот на министрите.

„Нема да биде потребно ниту самит на лидерите за да се донесе одлуката да започнат преговори со Македонија“, велат тие, додавајќи дека извештајот на ЕК за Македонија ќе биде подготвен во март или април, а потоа веројатно на јунскиот самит ќе се решава за датум за преговори.

Разочараноста во Македонија се толкува со преголемите очекувања создадени во јавноста во нашата држава, но во ЕК имаат разбирање за фрустрацијата, дотолку повеќе што и самите оцениле дека ако Македонија не добие охрабрување со преговори, тоа ќе има негативен одраз врз реформите. Според овие извори само Грција и Бугарија биле цврсто против препораката за Македонија, но од бугарски дипломати се навестува дека во јуни и тие ќе се приклонат на поддршката, иако и натаму ги споменуваат условите.

Што е поважно во Брисел многу пофлексибилно го толкуваат условот добрососедство и прогрес околу спорот за името, т.е. не како инсистирање дека мора да има решение, туку дека е доволно да се движи нешто околу спорот за да почнат преговорите, па прогласувањето на победа од функционерите во Грција им изгледа предвремено и нешто за што подоцна ќе треба да си го обелуваат образот.

Во ЕК сметаат дека примерот на Словенија и Хрватска покажал дека билатералните спорови се решаваат полесно низ процесот. „Фигуративно кажано, не добивте полна чаша туку половина“, сметаат во ЕК и за нив е битно дали нашата Влада испорачува тоа што се бара од неа. Овде Франција не се гледа како силен поддржувач на ставовите на Грција , како и Шпанија и Португалија, и се смета дека тоа се земји кои ги води сопствен скептицизам и дека со повеќе аргументи ќе ја поддржат препораката на ЕК.

Вчера на самитот на европските народни партии за ветото за Македонија проговори и бугарскиот лидер Бојко Борисов, кој запрашан дали му се врши притисок да попушти околу Македонија, не одговори директно, туку воопштено.

„Нашата позиција е категорична. Ние секогаш и целосно ја поддржуваме Македонија за влегувањето во ЕУ и во НАТО. Таа ни е најблиска држава и најголем пријател, но најпрво треба да се исполнат критериумите за добрососедството. Сепак, историјата не е нешто што може да се пишува одново и нешто што може да се менува. Постојат историски факти што се признати и прифатени и ние не можеме да допуштиме да ни се краде историјата. Евроинтеграцијата бара толерантност“, порача Борисов.

Вчера на самитот на народните партии присуствуваше и премиерот Никола Груевски, а во Брисел беше и грчкиот лидер Андонис Самарас. Пред лидерите од европските партии премиерот им се заблагодарил на сите земји што ни дадоа поддршка околу препораката нагласувајќи дека на министесркиот состанок имало жолчна дискусија и дека некои од нив го вложиле својот кредибилитет како никогаш досега. Тој изразил и разочарување што Македонија седум години има кандидатски статус и е прва од земјите од регионот што го доби.

„Направивме се' што можевме и заслужуваме преговори, изјави Груевски додавајќи дека во заклучокот има одреден напредок, но дека Македонија заслужувала повеќе. На сите им е јасно дека Македонија е соочена со сериозна неправда веќе подолг период но со неа сериозно се справува“, рече тој по состанокот, додавајќи дека тоа никој не го негира во ЕУ и дека Владата покрај се останува на реформите и отворена за дијалог.