13.12.2012, 20:09 Чичолина се враќа во политиката
Поранешната италијанска порно ѕвезда Илона Сталер - Чичолина, која е родена во Унгарија, ќе учествува на парламентарните избори во Италија кои најверојатно ќе се одржат во февруари следната година.
Чичолина ја потврди информацијата за италијанската телевизија „Скај Ти Џи 24“, истакнувајќи дека ќе формира партија под името „Демократија, природа, љубов“.
Заедно со 61-годишната Чичолина во формирањето ќе се вклучи и нејзиниот пријател Лука ди Карло, кој неодамна стана предмет на медиумско внимание поради наводното учество во порно филм.
Во изјавата за своите политички планови Чичолина нагласи дека нејзината нова партија нема да води битка со останатите италијански партии, туку ќе се бори за политика во интерес на италијанскиот народ.
Чичолина еден мандат беше пратеник во италијанскиот Парламент, а минатата година доби право на пензија од 3.000 евра месечно.
На почетокот на 21. век Чичолина се кандидира за градоначалник на Монца, а потоа и на Милано, но без успех. Таа беше основач и на италијанската Партија на љубовта.
Во минатото оваа порно ѕвезда двапати упати покана до Садам Хусеин да води љубов со неа во замена за ослободување на странски затвореници од ирачки затвори и за дозвола на меѓународни инспектори во Ирак, кои ќе проверат дали земјата произведува оружје за масовно уништување. Во април 2006 година Чичолина му испрати слична покана и на Осама бин Ладен, на кого му го понуди своето тело во замена тој да ја прекине со теророт врз невини луѓе.
|
