(ФОТО) Единаесет возила завршија во ендек на патот Гевгелија - Велес

Велес - Единаесет автомобили денеска претпладне излетаа од автопатот и завршија во ендек на автопатот Гевгелија – Велес. За среќа, нема повредени патници.

Сообраќајката се случила во периодот од 9 до 9,30 часот кај клучката и надвозникот за Штип. Не станува збор за верижен судир, туку повеќе автомобили од левата и од десната страна во должина од стотина метри излетале од автопатот. Причинета е материјална штета, а еден автомобил беше превртен на патот. Возачите велат дека причина за несреќата е лошиот коловоз и неисчистениот пат од голомразицата од страна на ЈП „Македонија пат“.

„На коловозот имаше дебел слој мраз, се лизгаше, автомобилот не можеше да се контролира. Многу беше лошо. Еве видете сите автомобили завршија во ендек. Не знам зошто ’Македонија пат‘ до 9 часот не ја исчистила оваа делница, иако местото е осојничаво��, реагираа денеска возачите.

Патниците од автомобилите, пак, ги зедоа торбите и се упатија кон Велес за да го продолжат патувањето во правец кон Скопје. Во овој термин, делницата од автопатот Гевгелија – Скопје, во должина од стотина метри, беше надвор од употреба, а возачите користеа алтернативни правци. Од СВР - Велес кратко соопштија дека ќе се истражуваат причините за несреќата. (П.П.)