12.12.2012, 14:29 Повисоки пензии, сепак, од март в година
На денешната седница на Комисијата за труд и социјална политика ресорниот министер Спиро Ристовски го отфрли амандманот на пратеничката група на СДСМ, со кој тие бараа зголемувањето на пензиите да биде од 1 јануари следната година, а не како што предвиде Владата од март 2013 година. Ристовски образложи дека амандманот е неприфатлив и изнуден. „Немаме намера да влегуваме во овие дневнополитички ситуации. Ќе ја реализираме програмата на Владата со која се предвидува зголемување на пензиите од март следната година“, истакна Ристовски.
Ставот на опозицијата го образложи претседателката на Комисијата Цветанка Иванова, која посочи дека доколку Владата не го прифати амандманот, ќе се види лицемерието на ВМРО-ДПМНЕ во однос на пензионерите како важна целна група за изборите.
Иванова рече дека ќе ја закаже оваа седница со девет закони дури откако ќе помине расправата за 15.000 амандмани на ДУИ и ќе биде донесен За��онот за бранители.
Министерот Ристовски, пак, и' реплицираше на Иванова дека во ситуација кога СДСМ кажува дека Фондот за пензиско е празен, партијата бара зголемување на пензиите од 1 јануари. „Ние кажавме дека Фондот е одржлив и уште во 2011 е кажано дека зголемувањето ќе биде реализирано“, прецизираше.
Пратеникот Игор Ивановски рече дека СДСМ не е против законите што се на дневен ред, и дека ќе предложат амандмани за нивно подобрување.
Инаку, февруарските пензии што пензионерите ќе ги добијат во март в година ќе бидат поголеми за пет отсто, со што сите пензионери во земјава ќе добијат линеарно - еднакво покачување на пензиите во висина од околу 550 денари. Зголемувањето од пет проценти ќе биде реализирано откако претходно во почетокот на 2013 годината пензионерите ќе го добијат редовниот раст од 2 проценти. Тој доаѓа како резултат на платите и животните трошоци, што ќе значи дека пензиите заклучно со февруари ќе пораснат за околу 7 проценти.
Освен Предлог-законот за дополнување на Законот за пензиското и инвалидското осигурување, по скратена постапка, на дневен ред на Комисијата за труд и социјална политика која ја води пратеникот Миле Печемски од ВМРО-ДПМНЕ, се измените и дополнувањата на Законот за социјална заштита, и уште други седум текстови во прво и во второ читање. (С.М.)
|
