Грција очекува конструктивност од Македонија

Официјална Атина порачува да не се прокоцкаат шансите за решавање на името

Од нашиот дописник
Миркица Поповиќ


Атина - Грчката и македонската влада да го следат примерот на граѓаните кои воспоставуваат пријателски врски и соработка. Ваква порака испраќаат од грчкото Министерство за надворешни работи, посочувајќи дека двата народи преку постојаните посети, пријателства и комуникација веќе имаат во пракса покажано дека двете држави може да бидат најдобрите пријатели во регионот. Од министерството очекуваат македонската влада по одлуките на Советот во Брисел да пристапи поконструктивно на преговарачката маса за да се најде заеднички прифатливо решение.

На новинарско прашање како министерството го коментира инцидентот во грчкото собрани�� кога пратеник на ултранационалистичката Златна зора го употреби терминот „Цигано-Скопјани“ говорејќи за македонскиот народ, потпаролот на министерството, Григорис Делавекурас рече дека овој навредлив термин во никој случај не ги изразува ставовите на грчката влада.

„Како потпарол на министерството не сум во позиција да ги коментирам ставовите на партиите, но овој термин во никој случај нема да го слушнете од кој било претставник или член на грчката влада и во никој случај не ја претставува грчката влада. Сакаме добри врски и можеме да ги имаме. Двата народи веќе имаат покажано дека постојат добри врски“, истакна Делавекурас.

Потенцираше дека двете страни имаат пред себе важно прашање кое треба да се реши со наоѓање заеднички прифатливо решение кое ќе ги почитува историјата и културата на двете држави. Според грчкото Министерство за надворешни работи, двете страни треба да седнат да разговараат за проблемот, но никогаш да не заборават дека се соседи, дека утре ќе бидат партнери и дека е во корист и на двте стани да се изградат пријателски врски и соработка.

„Илјадници граѓани од Поранешната југословенска република Македонија ја посетуваат Грција и исто толку Грци одат кај вас. Луѓето имаат покажано дека може да се пријатели, да соработуваат и напредуваат. Потребно е и владите да го следат нивниот пример“, додаде тој.

Делавекурас нагласи дека не треба да се прокоцкаат шансите за решавање на спорот за името. Грција оценува дека одлуките на Советот се позитивен чекор, кој може да поттике побрзо решавање на спорот за името. Според Делавекурас, одлуката на Советот јасно покажува кои се критериумите и предусловите кои треба да се исполнат за да напредуваме кон ЕУ.

Грчкиот професор по меѓународни односи, Аристотелис Ѕиамбирис, кој долго време го следи спорот за името, коментира дека треба многу внимателно да се чита одлуката која содржи интересни детали кои не постоеле во досегашните одлуки на Советот. Посочува дека од заклучоците може да се издвојат три клучни работи. Првото и најјасното е дека нема датум, што било очекувано. Втората важна работа е дека и Бугарија за прв пат станува дел од официјалната одлука.

„Бугарија станува неодделив дел од сложувалка за прв пат“, посочува Ѕиамбирис. Трет клучен момент е фактот што за прв пат има опиплив датум кога би можеле да почнат преговорите, односно пролет 2013. Иако е хипотетички, конкретниот датум во одлуката е сериозен мотив според Ѕиамбирис да се напредува во пристапниот процес и во процесот на решавање на спорот за името. Тој оценува дека со овие заклучоци на Советот ќе има голем притисок и кон двете страни за да се забрза решавањето на спорот за името, а не да се остави нерешено до недоглед.

Одлуката на Советот и' покажува пат на македонската влада кој треба да го изоди за да може да напредува, а Ѕиамбирис смета дека за нијанса врз неа е поголем притисокот.

Со самото тоа што повторно конечната одлука ќе ја има Советот, а не Комисијата, не треба да се заборави дека повторно ќе оценуваат и Грција и Бугарија, вели професорот.

Околу тоа дали Грција има одврзани раце да прифати решение до јуни, Ѕиамбирис смета дека се' ќе зависи од тоа какво решение има на масата, иако грчката политичка рамка е многу тесна. „Меѓутоа климата која постои кај двете страни е попозитивна, разговараат што значи дека се подобрува климата“, вели тој.

Вклучувањето на Софија во конечните заклучоци за Македонија се смета за дополнително комплицирање на работите. Се оценува дека не станува збор за никакво тајно грчко-бугарско здружување затоа што и двете страни јасно ги кажуваат нивните услови, па поради тоа се исклучува и можноста за некаков грчко-бугарски заговор.