ОМД: ЕУ место да го обедини Балканот, ги продлабочува разликите

Обединетата македонска дијаспора, во реакцијата по заклучоците на Европскиот Совет на кој не беше постигна согласност за определување датум за отворање на преговори за Македонија, оценува дека попуштањето на Унијата пред агендите на Грција и Бугарија ја нарушува стабилноста на регионот.

- ОМД верува дека Европската Унија треба да биде мост кој ја поврзува Европа. Место тоа, ЕУ се претвори во делител, кој ги продлабочува разликите во регионот, особено меѓу државите членки и уценетите држави кои не се членки, пишува во соопштението на ОМД.

Обединетата македонска дијаспора истакнува дека Македонија треба да биде горда на својот напредок во реформите, во градењето на пазарна економија и солидната макро-економска состојба, како и во развојот на мултикултурното општество и верската толеранција. ОМД оценува дека, место почитување на овие достигнувања, Европската Унија воведува тешко разбирлив принцип на добро-соседство како услов за интегрирањето на Македонија.

- Со повторното одложување на преговорите со Македонија, ЕУ уште еднаш сигнализираше дека не е способна да функционира согласно нејзините декларирани принципи. Македонија треба да го смени фокусот, да се концентрира на сопствениот економски развој и јакнење на демократските институции, а не да се занимава со агресивната реторика на Бугарија и на Грција. Брисел не признава дека Македонците се изложени на систематска дискриминација во Бугарија и во Грција повеќе од еден век. Со наградувањето на нивното однесување, ЕУ е подготвена на Владите на Бугарија и на Грција да им даде статус на чувари на портите, и со тоа да решаваат за иднината на Македонија во ЕУ, пишува во соопштението на ОМД.