Средба Груевски со лекарите во Влада



Доцна вечерва, сепак, ќе се оствари средба меѓу премиерот Никола Груевски и лекарите од двата синдикати, Самостојниот синдикат на Клиничкиот центар и Гранковиот самостоен синдикат. Се очекува на оваа средба да се разговара за платата по учинок за што лекарите штрајкуваат околу еден месец. Се очекува на маса да биде ставен предлогот на Самостојниот синдикат на Клинички, платата по учинок да се пресметува на квартално ниво, како и предлогот на Гранковиот Синдикат за зголемување на платата на лекарите за 20 отсто.

Владиниот портпарол Александар Ѓорѓиев, потврди дека одрзувањето на средбата меѓу премиерот и лекарите зависи од тоа кога ќе биде прекината владината седница. Инаку, премиерот Груевски викендов најави дека ќе ги прими докторите на средба доколку има за што да преговараат. Лекарите од Синдикатите очекуваа да бидат повикани во Владата. (Ек.Р.)