Стразбур пресуди: 60.000 евра отштета за Ел Масри



Одлуката на Големиот судски совет на Судот во Стразбур е конечна, Македонија нема право на жалба

Горан Адамовски

Македонија ја прекрши европската конвенција за човекови права во случајот Калед Ел Масри, поради што на германскиот државјанин треба да му исплати 60.000 евра отштета. Едногласната пресуда на Големиот судски совет на Европскиот суд за човекови права во Стразбур е конечна, Македонија нема право на жалба.

Во решението објавено на официјалната страна на судот, се наведува дека бил прекршен членот 3 од Европската конвенција за човекови права, со кој се забранува нечовечко и понижувачко однесување, членот 5 правото на слобода и сигурност, членот 8 право на приватен и семеен живот, како и членот 13 право на правично судење.

„Се' уште дета��но не сме ја разгледале пресудата, го видовме само оперативниот дел. Треба да се нагласи дека право на жалба - немаме, бидејќи одлуката ја донесе Големиот судски совет, кој се смета за второстепен, поради што тоа е конечно решение“, ни изјави владиниот агент Костадин Богданов, кој ја застапува Македонија во Стразбур.

Адвокатот на Ел Масри, Филип Медарски, логично, е задоволен од пресудата.

„Пресудата на судот во Стразбур за Македонија значи признавање на ’случајот Ел Масри’. Втората работа, која е битна, се однесува на формирање на Комисија која уште еднаш ќе го испита овој случај, а на што ние инситиравме од прв момент. Последна работа е утвдрдување не евентуалната направена штета со грабнувањето на Калид ел Масри, но и направени други штети“, изјави адвокатот Филип Медарски.

Судот ги прифати тврдењата на Ел Масри (49), кој ја посочи земјава како директно одговорна за петте месеци тортура врз него. Лошата епизода со Германецот со либанско потекло, што ќе не' чини многу, започна на 31 декември 2003 година кога тој, патувајќи со автобус, преку Табановце сакал да влезе во Македонија поради одмор. Веднаш бил уапсен, веројатно поради сличноста на неговото име со осомничениот терорист Калид ал Масри. Според неговите наводи, 23 дена бил држен во хотел во Скопје, каде од него било барано да ги признае своите врски со Ал Каеда. Преживеал физичка и психичка тортура и измачување, по што со врзани очи бил однесен на скопскиот аеродром и предаден на агенти на ЦИА, кои го одвеле во затвор во Авганистан. Таму бил држен и малтретиран до 28 мај 2004 година, кога бил вратен во Албанија. Веднаш потоа, презеде мерки за судски епилог. Во 2009 година ја тужеше Македонија.

Случајот процес во Стразбур започна во мај годинава, при што Малиот судски совет одлучи дека не може да се изјасни по предметот. Македонија се правдаше дека Ел Масри бил испитуван од полицијата поради сомневање дека патува со фалсификувани документи, му било дозволено да влезе во земјава и потоа заминал преку граничниот премин кон Косово. На судењето писмено сведочеше и поранешен македонски министер за внатрешни работи, кој потврди дека македонската полиција, постапувајќи по важечки меѓународен налог за апсење издаден од властите на САД, го уапсила Ел Масри, го држела под изолација во Скопје и го предала на агенти на ЦИА. За овој случај, Македонија беше критикувана во Парламентарното Собрание на Советот на Европа и Европскиот парламент.