Министерката Јанкулоска имаше сообраќајка

Министерката Гордана Јанкулоска имаше помала сообраќајна незгода претпладнево, со службеното возило на булеварот „Првомајска“ во Скопје. Јанкулоска и нејзиниот возач не се повредени и се чувствуваат добро. Министерката по настанот се вратила на работното место во МВР и продолжила со редовните работни обврски.

„Сообраќајката не беше страшна. Сите сме добри“, ни изјави Јанкулоска неколку часа по несреќата.

Сообраќајката се случила околу 11,30 часот кога службеното возило „фолксваген пасат“ на министерката се судрило со автомобил „фиат добло“. Со службеното возило на МВР управувал возач, а министерката во моментот на несреќата била на совозачкото седиште.

„Веднаш беше извршен увид на местото на несреќата и дополнително ќе се утврдуваат причините како дошло до судир на двете возила. Најважно е што никој не е повреден и министерката продолжи со работните обврски во текот на денот“, вели помошник-министерот за информирање во МВР, Иво Котевски. (Х.Р.)