Буџетот н��извесен - опозицијата денес гради став

Социјалдемократите денес треба да пресечат како ќе се однесуваат во натамошната расправа за буџетот

Нина Нинеска-Фиданоска



Влегува ли навременото усвојување на буџетот во крајна неизвесност и се наѕира ли доближување до одлука за привремено финансирање, или, пак, на 31 декември сепак ќе имаме национална каса верификувана од Законодавниот дом.

Социјалдемократите денес треба да пресечат дали ќе го блокираат носењето на буџетот за 2013, или ќе овозможат тој непречено да се изгласа. Партијата за ова прашање ќе го гради својот став на седница на Централниот одбор, како една од главните теми за расправа.

Без намера да ја прејудицира партиската одлука, потпретседателот на СДСМ, Зоран Заев, најави дека негов личен став е дека нивните пратеници треба да го спречат усвојувањето на овој економски документ доколку Владата не прифати да го намали буџетскиот дефицит на 2,5 отсто, од планираните 3,5 проценти од БДП, и доколку не се откаже од непродуктивните трошоци, како што се оние за „Скопје 2014“ и за реклами. Заев, во интервју за телевизијата Алфа го критикуваше зголемувањето на буџетскиот дефицит и забрзаното задолжување на државата, како штетни економски политики кои би довеле до грчко сценарио.

„Утрински“ го праша министерот за финансии Зоран Ставрески дали Владата би можела да прифати намалување на буџетскиот дефицит од 3,5 на 2,5 отсто доколку тоа се јави како услов за да се деблокира расправата и буџетската каса да добие навремена собраниска верификација. Од Кабинетот на министерот одговорија дека „таков предлог досега не е доставен до Министерството за финансии, а доколку се достави, тогаш овој ресор ќе се изјасни“.

Од финансии побаравме и одговор дали има изгледи Владата да прифати барем некои од амандманите битни за опозицијата, со цел тие да го повлечат преостанатиот огромен број, и така да се забрза расправата во собраниската Комисија за финансирање и буџет. Од таму нема конкретен одговор дали Владата ќе прифати некој од амандманите, но првиот финансиер прстот го вперува кон опозицијата за блокада во комисијата.

„Буџетот за 2013 година е блокиран во Собранието, бидејќи опозицијата поднесе 1.226 амандмани на буџетот и дополнителни 160 на законот за кредит кај Светска банка, кој е составен дел од буџетот затоа што се однесува на негово финансирање. Расправата за буџетот е блокирана бидејќи со часови се зборува за еден амандман, пратеници од опозицијата си реплицираат и контрареплицираат на самите себе. На крајот штетата е на граѓаните и на Македонија. Финансиската штета од ова е 84 милиони евра - средства кои граѓаните ќе мора да ги платат за повисоки камати. Ќе се наруши и рејтингот на државата. Штетата ќе биде директна за земјоделците, пензионерите, социјалните категории, стопанствениците...“, се вели во изјавата од Кабинетот на првиот финансиер.

Во Комисијата за финансирање и буџет и вчера продолжи амандманската расправа, која течеше бавно. Опозициските амандмани за кои се дебатираше, повторно наидуваа на одбивање од Владата.

Пратениците од ВМРО-ДПМНЕ и од коалициските партнери, членови на Комисијата за буџет, вчера поднесоа барање да се работи и во сабота и во недела со цел што побрзо да се донесат амандманите и буџетот. Пратеникот Александар Николовски упати апел до колегите од СДСМ и другите опозициски партии да се вразумат и преку конструктивна вклученост да се донесе буџетот на државата. „Доколку на 24 декември, за кога и е закажана седница, не биде ставен на дневен ред буџетот, во тој случај нема да биде донесен до крајот на оваа календарска година“, изјави Николовски. Според некои пресметки од пратениците од мнозинството, ако вака се одвива расправата, би биле потребни шест месеци.

Од СДСМ возвратија дека ВМРО-ДПМНЕ продолжува со своите обиди за манипулирање со јавноста. „Комисијата за финансирање и буџет работи со полна пареа. Досега се одржаа 47 седници, и за споредба, до денес исто толку пленарни седници има одржано Собранието. Амандманите на опозицијата се добри предлози, исклучиво во интерес на граѓаните. Наместо да ја обвинуваат опозицијата за наводни блокади, ВМРО-ДПМНЕ нека ги прифати амандманите и расправата веднаш ќе заврши“, велат од партијата. Од таму ја повикаа ВМРО-ДПМНЕ да „престане со неоснованото ширење паника бидејќи законот јасно утврдува дека дури и со еве��туалното доцнење, нема да страдаат ни пензионерите, ни социјалните групи, ни земјоделците, ни кои било други категории на граѓани“.

Инаку, и вчера не престанаа повиците за деблокада на собраниската расправа.

Се огласи бизнисот. „Задоцнувањето на донесувањето на буџетот во која било форма е неповолно и донесува дополнителни доцнења во делот на исплатата на буџетските обврски на државата кон реалниот сектор“, изјави Антони Пешев, потпретседател на Стопанската комора на Македонија. За Стопанската комора недонесувањето или привременото функционирање на буџетот ќе значело намалување на економската активност. „Цениме дека Македонија треба да најде сили да не прави циркус од овој процес и да го донесе буџетот и по цена на потенцијални грешки кои може да се случат. Нема полоша работа од тоа државата како еден од најголемите корисници на македонската економија да не е во состојба да функционира поради недонесувањето на буџетот. Затоа препорачуваме и би сакале да видиме донесување на буџетот“, потенцира Пешев.

Сојузот на здруженија на пензионери на Град Скопје бара буџетот да се донесе до 31 декември, за да може да се оствари најавеното зголемување на пензиите од 1 март. „Кочењето на оваа собраниска Комисија или одолжувањето на носењето на буџетот ќе се одрази пред се' врз нашиот стандард и нашите права што сме ги стекнале во текот на нашето 40-годишно работење“, изјави Крсте Ангеловски, претседател на Сојузот на здруженија на пензионери на Град Скопје.