Црвенковски се повлекува во мај – наследник Зоран Јовановски

Во СДСМ тивко се подготвува лидерска смена. Без оглед на исходот од локалните избори, кормилото ќе премине во други раце

Наум Котевски


Во СДСМ тивко се подготвува лидерска смена. Наши извори велат дека, најверојатно, тоа ќе се случи на конгресот во мај, по локалните избори. Како најверојатен наследник на Црвенковски е Зоран Јовановски, потпретседател на СДСМ. Партиски извори велат дека смената ја предложил самиот Црвенковски, а во договор со најблиските соработници изборот за наследник паднал на економистот Зоран Јовановски, кој треба да го поведе СДСМ во новата ера – умерена политика која ќе се потпира на социјалдемократските вредности без да подлегнува на популистичката еуфорија што доаѓа од демохристијанската десница на власт ВМРО-ДПМНЕ.

Се' е поизвесно дека Бранко Црвенковски, неприкосновениот авторитет во Социјалдемократскиот сојуз, ќе се повлече од престолот на партијата на кој се наоѓа од Првиот конгрес 1991 година, па се' до денес, со исклучок на периодот од 2004 до 2009 година, кога ја извршуваше функцијата претседател на државата.

Политичарот, кој веројатно остави најголема трага на политичката плурална сцена во Македонија и кого јавноста го гледаше како наследник на реформираната комунистичка идеја, во неколку наврати најави дека нема повторно да се кандидира за претседател на редовниот партиски конгрес во мај наредната година, а можна е и опцијата да свика вонреден конгрес многу порано.

Црвенковски, неодамна во телевизиско интервју за Алсат во емисијата „Во центар“ на Васко Ефтов, на прашањето дали може на конгресот неговиот некогашен човек од доверба, а сега голем противник, Владо Бучковски, да биде негов противкандидат, категорично одговори дека тоа „нема шанси да се случи, бидејќи има други планови“.

Потпретседателот на СДСМ, Зоран Заев, кој еден кус период беше лидер на СДСМ до враќањето на Црвенковски од функцијата претседател на државата, завчера во емисијата „Вин-вин“ на телевизија Алфа, не го демантираше повлекувањето на Црвенковски и рече дека нему лично му е предизвик да ја води СДСМ, но доколку се појави друг кандидат, ќе го поддржи.

Во СДСМ не сакаат официјално да ги коментираат шпекулациите за тектонски кадровски промени во партискиот врв, велејќи дека моментно се занимаваат со многу поважни точки од нивната политичка агенда, но добро упатени извори од партијата велат дека одлуката е донесена: Црвенковски заминува во мај без оглед на исходот од претстојните локални избори.

Заминувањето на Црвенковски ќе значи и влегување на СДСМ во транзициски период на привикнување на новиот лидер и луѓето кои ќе ги именува за свои соработници. Но, процените се дека тој период нема да трае долго, бидејќи веќе во 2014 година ќе дојдат на ред претседателски избори на кои СДСМ треба да го покаже своето ново лице и дејствување.

Црвенковски, по враќањето од претседателската функција на државата, успеа да ја хомогенизира раслоената партија, но по неколкуте изборни порази од ВМРО-ДПМНЕ, меѓу членството настапи разочарување и тивко незадоволство. „Денес е тешко да не си вмровец во државата, но најтешко е да си социјалдемократ“, рече Заев во интервјуто на Алфа.

Најавите дека Зоран Јовановски ќе го преземе кормилото на СДСМ претставуваат радикален персонален пресврт во политичката левица, чие постоење и дејствување во изминатите 20 години се врзуваат за Црвенковски.

Црвен картон за Бузлевски, зелен за Есад Рахиќ

Раководството на СДСМ на денешната седница на партискиот Централен одбор, покрај за стратегијата за буџетот, ќе одлучува и за исклучувањето на Димитар Бузлевски од партијата, поради најавата дека ќе се кандидира за градоначалник на Ресен како независен кандидат. Партиски извори најавуваат дека е се' поизвесно дека партијата ќе донесе ваква одлука, која е во согласност со Статутот. Тоа го најави и потпретседателот на СДСМ, Зоран Заев, во емисијата „Вин-вин“, каде што оцени дека пред локалните избори на членовите и на симпатизерите мора да им пратат јасна порака зад кој кандидат во Ресен стои партијата.

Денеска се очекува да биде донесена и одлука за кооптирање на Есад Рахиќ во Централниот одбор на партијата. Рахиќ, по неколкугодишно дистанцирање од партијата поради несогласување со партиските политики, им се приклучува на социјалдемократите во пресрет на мартовските избори. Тој истовремено ќе биде именуван и за организациски секретар во Скопје, а неговата задача ќе биде да го зајакне партискиот разгранок во Скопје и на скопските општини.