Лекарите-штрајкувачи добија плата „според ефикасност“

Докторите од секоја клиника зеле поинакви плати, некои помали и до 50 отсто

Лекарите продолжуваат да штрајкуваат, па не се повлекуваат дури ни поради многу ладното време и ниски температури. Тие и денеска излегоа на получасовен протест кој, како што велат, ќе продолжи и на минус 30 степени доколку нивните предлози за промена на моделот „плаќање според сработеното“ не бидат прифатени од Министерството за здравство.

Инаку, лекарите-штрајкувачи се зачудени на висината на последните плати за ноември. Тие добиле помали износи врз основа на непознати пресметки за нив.

На клиниките за кожни болести и за рендгенологија завчера биле исплатени плати пониски за 50 отсто, а на некои доктори-специјалисти од Клиниката за гинекологија платата им изнесувала 7.000 денари. Лекарите велат без никакво образложение.

„Имаме многу забелешки во однос на исплатата. Има многу прекршоци и основи за поднесување кривични тужби. Се врши притисок врз директорите да постапуваат како што не треба. Тоа се заработени пари на докторите и ќе ги бараме по судски пат“, изјави денеска Дејан Ставриќ, претседател на Самостојниот синдикат на Клинички центар.

Нејасно е зошто платите на некои од лекарите се намалени повеќе од другите и дали е земено предвид пресметувањето по моделот „плаќање според ефикасност“. На прашањето каква плата очекуваат за декември, затоа што веќе е извесно дека штрајкот ќе продолжи до крајот на месецот, тие велат дека тоа е невозможно да се предвиди.

„Ноемвриската плата е чудна, уште анализираме како е пресметана, така што не се знае што ќе биде со платата за декември“, додаде Ставриќ.

Во врска со разговорите кои Штрајкувачкиот одбор ги имаше со премиерот Никола Груевски, специјалистите велат дека се надеваат оти тоа ќе помогне во надминување на проблемите. (М.Т.)