Жерар Депардје заминува за Белгија

Актерот најави дека планира да го врати францускиот пасош, личната карта и социјалното осигурување, бидејќи повеќе не сака да плаќа данок во Франција

Францускиот актер Жерар Депардје наскоро би требало да стане белгиски глумец, откако најави дека планира да го врати францускиот пасош, личната карта и социјалното осигурување, бидејќи повеќе не сака да плаќа данок во Франција.

Депардје навреден од начинот на кој беше коментирана неговата одлука да се пресели даночно во Белгија, каде на самата граница со Франција купи куќа, вчера со отворено писмо објавено во неделникот „Журнал ди диманш“ му се обрати на францускиот премиер Жан-Марк Еро.

- Јас не барам да добијам одобрување за мојот гест, но барам да бидам почитуван! Сите оние кои ја напуштија Франција не беа навредувани на ист начин како што сум јас, пишува Депардје.

Тој потсетува дека започнал да работи на возраст од 14 години и дека секогаш ги плаќал сите даноци и давачки во Франција.

- Во изминатите 45 години платив 145 милиони евра даноци, за мене работеа 80 лица, нагласува Депардје, иден жител на Нешан во Белгија. Тој тврди дека и понатаму ќе ги сака Французите.

Пред заминувањето во Белгија, Депардје ја даде на продажба куќата во Париз, поточно личниот хотел Шамбон, во срцето на Сан-Жермен де Пре, која располага со 1.800 м2 односно 20 простории од кои 10 спални, базен, лифт, тераса и опремена кујна, како и 200 м2 градина, неодамна реновирана и со скромна цена од околу 50 милиони евра.

Сите француски ѕвезди и богаташи не ја напуштаат Франција поради најавеното зголемување на даноците врз богатството. Мишел Сарду, кој како што сите знаат не е пејач кој ја поддржува левицата, серизоно го критикуваше изборот на Депардје. Тоа што сите оние кои заработуваат повеќе од еден милион евра ќе биде оданочени во висина од 75 отсто, за Сарду не е шокантно, посебно во период на криза и кога е потребна национална солидарност со оние на кои таа им е потребна.

Повеќе медиуми, француски и странски, пишуваа по изборот на претседателот Франсоа Оланд дека најбогатите Французи бараат начин да го избегнат плаќањето на данокот, преку даночно отселување од земјата.

Француските политичари бараат начин да ги оданочат своите државјани кои сакаат на ваков начин да ги избегнат даноците, размислувајќи за воведување на закони слични како тие на САД, чии државјани без разлика во која земја живеат се даночни обврзници на САД.