17.12.2012, 09:27 Црногорките на европскиот престол!
Најмалата земја славеше со 34:31 против Норвешка дури по две продолженија од по пет минути во финалето на ЕП во Србија
Европа доби нови ракометни шампионки откако Црна Гора стана само четвртата нација на Стариот континент што ја освоила титулата. Во трилерот од кој застанува здивот и кој заврши дури по две продолженија од по пет минути Црна Гора славеше со 34:31 против Норвешка, која ги освои претходните четири еврошампионати од 2004 година наваму.
Некој можеби ќе рече дека ѕвезда на финалната вечер на јубилејното 10. Европско првенство во Србија беше црногорскиот тим во целина, но над сите заблесна ѕвездата на голманката Соња Барјактаровиќ, која, едноставно, правеше чуда во текот на целиот натпревар во белградската арена „Комбанк“. Покрај проблемите со противничкиот чувар на ��режата, Норвежанките имаа проблеми и со сопствената одбрана, посебно со двата црногорски бека - левиот Милена Кнежевиќ и десниот Катарина Булатовиќ. Токму кога ќе им посветеа дополнително внимание на двете ракометарки, црногорските крила знаеја да профитираат од поголемиот простор што го добиваа. Билјана Павиќевиќ на лево крило и Расмила Милјаниќ или Јованка Радичевиќ на десно ги искористуваа шансите што им се укажуваа.
Таквата игра им овозможи предност на Црногорките во поголемиот дел од првото полувреме, во кое имаа по два гола позитива во повеќе наврати, па иако Норвешка се врати и поведе со 9:7, главно благодарение на левиот бек Ања Един, која подоцна го доби признанието за МВП на првенството, Црна Гора замина на паузата со водство од 12:11. Олимписките вицешампионки од Лондон, каде што го загубија финалето токму против Норвежанките, го отворија второто полувреме со зголемување на разликата на три гола, но бранителките на престолот не се откажуваа. Нивните искуство и борбен дух, како и голманката Катрине Лунде Харалдсен ги вратија во игра, изборувајќи продолженија со израмнувањето на 24:24 десетина секунди пред крајот на основниот дел.
И по првите десет дополнителни минути беше нерешено 29:29, како и по првата половина од вториот екстра-период (30:30). Конечно, во последните пет минути Црногорките покажаа посилни нерви и спречија да се оди на изведување седмерци. Едноставно, тие ја имаа Барјактаровиќ, која тогаш забележа уште неколку одбрани, Норвежанките направија неколку технички грешки и победникот конечно беше решен.
Владеењето на Норвешка заврши, Црна Гора е новиот европски првак!
АЏИЌ: МНОГУ СМЕ ГОРДИ
Драган Аџиќ (селектор на Црна Гора): „Наш голем сон беше конечно да ги победиме светските, олимписки и европски шампионки. Денеска го остваривме тоа и многу сме горди. Се надевам дека ќе ја задржиме оваа генерација заедно колку што е можно подолго, бидејќи освојувањето на оваа титула беше долгорочен проект, кој бараше доста напорна работа и трпение“.
Соња Барјактаровиќ: „Тежок натпревар од 80 минути, во кој сонувавме да ги детронизираме Норвежанките и сега го имаме тоа. Моето срце е големо колку на мојата земја“.
Милена Кнежевиќ: „Во ниту еден момент не ни помислив да не ја преземам одговорноста, бидејќи ова цело време беше тимски обид и секој што е на теренот го има тоа што е потребно за да биде меч-винер. Покажавме флексибилност и упорност многу пати претходно и токму од тоа е создадена секоја шампионска селекција“.
Катарина Булатовиќ: „Сонував за тоа да стојам на подиумот со златен медал околу вратот и немам зборови за да опишам како се чувствувам. Размислував да се повлечам од репрезентацијата по Олимпијадата поради напукнатиот мускул, но нашиот лекарски тим заврши фантастична работа и им должам огромна благодарност што ме подготвија за ЕП“.
Торир Хергеирсон (селектор на Норвешка): „Црна Гора имаше поголема желба за победа и извршија поголем притисок врз нас отколку ние врз нив. Беа поефикасни. Освоеното сребро е нов мотив за мојот тим. Ќе имаме нови цели во иднина“.
РЕКОРДНО ПОЛУФИНАЛЕ
Посетеноста на полуфиналниот дуел меѓу Србија и Црна Гора од 13.598 гледачи е нов рекорд на европските првенства за ракометарки. Претходниот рекорд го имаше полуфиналето на ЕП 2010 меѓу соорганизаторите Норвешка и Данска, кое го следеа 11.500 гледачи на трибините во Хернинг.
МАКЕДОНИЈА ПОСЛЕДНА
Конечен поредок: 1. Црна Гора, 2. Норвешка, 3. Унгарија, 4. Србија, 5. Данска, 6. Русија, 7. Германија, 8. Шведска, 9. Франција, 10. Романија, 11. Шпанија, 12. Чешка, 13. Хрватска, 14. Украина, 15. Исланд и 16. Македонија.
|
