28.02.2012, 11:44 Металург го доби посакуваниот Загреб
Задоволни и Хрватите од ждрепката за осминафиналето на ракометната Лига на шампионите
Општо задоволство владее и во Скопје и во Загреб по денешната ждрепка за осминафиналето на Лигата на шампионите во ракомет, која ги вкрсти Металург и Кроација осигурање. Ни македонскиот ни хрватскиот првак не го посакуваа Копенхаген со кој се „усреќи“ Севехоф, а колку-толку прифатливиот Веспрем му оди на нозе на Адемар Леон. „Металурзите“ прво ќе ги нагостат загрепчани на 18 март, а реваншот треба да се одигра меѓу 21 и 25 март.
„Лично, го посакував Веспрем, но ни Загреб не е лоша опција“, е првата реакција на претседателот на Металург, Ристо Чокрев. „Гледајќи ги извлечените двојки, можеби имавме и среќа, бидејќи ако бевме на местото на Цимос Копер, ќе игравме со Кјелце, кој, според мене, е поквалитетен од Загреб. Во дуелите со загрепчани ќе влеземе растоварени и ќе направиме се' за да го поминеме реномираниот противник“.
Слични тонови и од Загреб, но со потајно стравување дека нивниот поранешен тренер Лино Червар, кој веќе втора сезона седи на клупата на Металург, би можел да им ја запржи чорбата. (Р.Д.)
ЛАЗАРОВ И АТЛЕТИКО СО ШАФХАУЗЕН
Атлетико Мадрид, за кој игра Кирил Лазаров, за противник во осминафиналето на Лигата на шампионите го доби швајцарски Кадетен Шафхаузен. Другите двојки се: Фиксе Берлин - Хамбург, Монпелје - Барселона, Висла Плок - Кил, Адемар Леон - Веспрем, Кјелце - Цимос Копер, Металург - КО Загреб и Севехоф - Копенхаген.
Термините за првата елиминациска рунда во ЛШ се 14-18 и 21-25 март.
|
