Умре Бихаќка, се роди Павел Шатев

Во предложената листа се предвидува едно име да се избрише од една улица, за тоа да се искористи за ново име за друга улица. Таков е примерот со имињата на Павел Шатев, Мајка Тереза, Васил Чакаларов, Адолф Циборовски. На некои личности, пак, ќе им се укаже чест по нив да бидат именувани два инфраструктурни објекта. Таков е случајот со Мајка Тереза и Тодор Александров. По нив ќе се именуваат и улица и мост.

Деспина Трајковска


Скопјани уште денес можат да почнат да ги учат новите имиња на дел од улиците, мостовите и парковите. Засега е утврдено како ќе се преименуваат два моста и еден парк и 29 од речиси триста улици што ќе добијат нови имиња.

Седиштето на СДСМ веќе нема да биде со адреса „Бихаќска“. Таа улица отсега ќе се вика „Павел Шатев“. Кафе-шема нема да се тера на „Ленинова“, туку на „Аминта Трети“. „Максим Горки“, улицата со убава глетка на јапонските цреши во центарот на Скопје, сега ќе ја лоцираме како „Никола Кљусев“. Во Ново Лисиче нема да поминуваме по мостот „Близнак“, туку по „Тодор Александров“, чие име ќе го носи и улицата „Салвадор Алјенде“. Според Мајка Тереза, ќе се прекрстат мостот „Република“ и улицата „Водњанска“, а пак нејзиното име ќе се избрише од една улица, која отсега ќе се вика „Адолф Циборовски“.

Овие имиња, всушност, се прва фаза од проектот за преименување на улиците во главниот град. Се очекува тие да добијат „зелено“ светло в четврток, на седница на Советот на град Скопје. Советниците се очекува да ги одобрат сите утврдени предлози, со оглед и на досегашните одобрени листи, благодарение на мнозинството на владејачката коалиција во Советот.

Предложено е две улици да ги носат имињата на поранешните претседатели на државава. Улицата „Првомајска“ е предложено да се преименува во „Борис Трајковски“ а, пак, по првиот македонски претседател Киро Глигоров е предвидено да се именува булевар „Војводина“. Улицата „Железничка“ е во план да се именува по Јордан Мијалков.

Се предлага и поранешниот американски претседател Роналд Реган да добие своја улица, односно неговото име да го носи досегашната „Васил Чакаларов“. Улицата, пак, што досега се викаше „Павел Шатев“ ќе се преименува во „Владимир Полежановски“ а „Кумбара“, пак, ќе биде новото име на „Севастополска“. Во оваа фаза, дел од предложените имиња се и „Христо Батанџиев“, „Антон Димитров“ и „Петре Пирузе“, кои би ги замениле „Социјалистичка зора“, „Жарко Зрењанин“ и улица „Мексичка“.

Се предлага промена и на познатата со децении „Мито Хаџивасилев-Јасмин“. Таа сега би го носела името „Кирил и Методиј“. За „Маршал Тито“ од одамна е решено да се вика „Македонија“.

Градските власти одлучиле досегашните улици „Стив Наумов“ и „Војвода Васил Аџиларски“, со оглед на правецот на протегање, да се спојат во една улица која ќе го носи името „Филип Втори“. Исто така, објаснуваат од градот, улицата „Христо Батанџиев“, бидејќи не ги исполнува урбанистичко-техничките услови за улица, треба да се приклучи кон улица „Галичник“.

Во оваа фаза е утврден и предлог за ново име на еден парк. Односно, просторот помеѓу улиците „Самуилова“ и „Свети Прохор Пчињски“ на Кале е предвидено да го носи името на Мустафа Кемал Ататурк.

Кога ќе бидат утврдени останатите преименувања на улиците, мостовите и другите инфраструктурни објекти, наводно, се' уште не е познато. Тоа значи дека допрва ќе се одлучува кои улици ќе се преименуваат со другите над двестето предлози, речиси сите прифатени од владејачката коалиција.