На „сослушување“ лекари кои препишувале скапи лекови

Клинички лекари биле повикани во Министерството за здравство да остават податоци за себе и за лековите што ги препишувале

Јасмина Јовановска


Ќе се штеди ли на скапите лекови и во болниците? Дали пациентите навреме ќе ја добијат терапијата која најмногу одговара за нивната болест или ќе мора да чекаат лековите да не им дејствуваат за да може се лекуваат со понова генерација лекови. Овие прашања се' погласно си го поставуваат лекарите од неколку клиники кои во Министерството за здравство требало да се јават да остават лични податоци за себе и за скапите лекови што ги препишувале. До клиниките за онкологија, за хематологија, за нефрологија, за трансфузиологија, за ендокринологија, за ревматологија било испратено писмо со кое лекарите кои препишуваат цитостатици, инсулин и други скапи лекови се повикуваат на „сослушување“ кај одредено одговорно лице во Министерството за здравство. Образложението било дека Министерството ги бара овие податоци, бидејќи прави регистар за овие лекови.

„Ако се прави регистар на лекови, зошто не бараат податоци од клиниката, какви и колку лекови се трошат, туку не' викаат нас лично“, реагираат лекарите. Според нив, ова е директен притисок врз стручноста и прашуваат дали ова не е начин како државата по теркот на аптеките да заштеди и на скапите лекови што се трошат во болниците. Но, лекарите уверуваат дека ако е тоа намерата, Министерството треба да знае дека форсирањето на евтината терапија може да се врати како бумеранг со зголемени трошоци во лекувањето, поради подолготрајната терапија и можните компликации.

Од Министерството за здравство, пак, се правдаат дека податоците за лекарите и лековите што се препишуваат се бараат за да се изготват регистар на лекари и на лекови што се трошат во болниците. Со помош на овие регистри, Министерството планира да ја реализира иницијативата за спроведување медицински протоколи за лекување изготвени од реномирани странски институции за разни малигни заболувања, реума, дијабетес. Преку регистарот, сметаат во Министерството, ќе се подобри комуникацијата и координацијата на лекарите со Министерството за здравство што се неопходни во спроведување на медицински протоколи.

„Станува збор за контакт-информации за да може секторот за секундарна здравствена заштита да ја подобри комуникацијата со секој лекар на индивидуално ниво. Податоци се бараат, исто така, и од болниците за овие лекови и медицински состојби“, објаснуваат од Министерството.

Во Министерството негираат дека регистрите се прават за да се штеди на скапите лекови, туку за да се добие попрегледна евиденција на лековите што се трошат во клиниките и во болниците и болните да не останат без терапија“. Следен чекор е воведување електронска евиденција и мрежно поврзување на сите лекови, посебно на тие кои се наведени во списокот, за да се знае точ��иот број пациенти на кои им се потребни овие лекови и за нивно навремено обезбедување“, додаваат во Министерството.